نئی دہلی
دہلی کو صرف ایک ٹرانزٹ ہب کے بجائے ایک مکمل سیاحتی مقام کے طور پر دیکھا جانا چاہیے، یہ بات وزیر اعلیٰ ریکھا گپتا نے ہفتہ کے روز کہی۔سیاحت سے وابستہ اسٹیک ہولڈرز کی ایک کانفرنس میں شرکت کے دوران انہوں نے کہا کہ قومی دارالحکومت ہونے کے ناطے دہلی کی اپنی منفرد خصوصیات ہیں۔
انہوں نے کہا کہ ہم سیاحت کے شعبے میں دہلی کی مثبت برانڈنگ کرنے کی کوشش کر رہے ہیں تاکہ سیاح اس شہر کو ایک منزل کے طور پر دیکھیں اور اس کی منفرد خصوصیات سے لطف اندوز ہوں، نہ کہ صرف ایک گزرگاہ کے طور پر۔وزیر اعلیٰ نے کہا کہ دہلی میں کئی تاریخی یادگاریں اور سیاحتی مقامات موجود ہیں جنہیں دیکھنے کے لیے لوگ بے تاب رہتے ہیں۔ "لوگ پارلیمنٹ، راشٹرپتی بھون اور دیگر کئی مقامات دیکھنا چاہتے ہیں۔
انہوں نے بتایا کہ گزشتہ ایک سال میں دہلی حکومت نے سیاحت کے نظام کو بہتر بنانے کے لیے کئی اقدامات کیے ہیں، جن میں دہلی فلم فیسٹیول کا انعقاد، دہلی ٹورزم بورڈ کا قیام اور اہم مقامات پر مضبوط معلوماتی نظام نافذ کرنا شامل ہے۔ریکھا گپتا نے کہا کہ دہلی ثقافتی تنوع کا مرکز ہے؛ یہاں مختلف ریاستوں اور شناختوں سے تعلق رکھنے والے لوگ ملتے ہیں۔ سیاح یہاں ثقافتی مقامات، مندر، کھانے اور دستکاری سب کچھ دیکھ سکتے ہیں۔
انہوں نے دہلی کے کھانوں کی بھی تعریف کی اور کہا کہ جو ذائقہ دہلی میں ملتا ہے، وہ کہیں اور نہیں ملتا، میں یہ دعویٰ کرتی ہوں۔سیاحت کے وزیر کپیلا مشرا، جو اس کانفرنس میں موجود تھے، نے کہا کہ حکومت دہلی میں فلم شوٹنگ کے لیے سنگل ونڈو کلیئرنس سسٹم لانے کا منصوبہ بنا رہی ہے۔
