محکمہ موسمیات (آئی ایم ڈی) کے مطابق اڑیسہ، پنجاب، ہریانہ، چندی گڑھ اور دہلی میں 5 جنوری تک گھنے سے بہت گھنے کہرے کا سلسلہ جاری رہنے کا امکان ہے، جبکہ مشرقی اتر پردیش میں 2 جنوری تک ایسی ہی صورتحال رہنے کی پیش گوئی کی گئی ہے۔ مغربی راجستھان میں 3 جنوری 2026 تک گھنا کہرا چھایا رہنے کا امکان ہے۔ محکمہ موسمیات نے مزید بتایا کہ جموں-کشمیر-لداخ-گلگت-بلتستان-مظفرآباد اور جھارکھنڈ کے بعض علاقوں میں بھی 2 جنوری تک رات اور صبح کے اوقات میں گھنے کہرے کا امکان ہے۔

اس کے علاوہ ہماچل پردیش، اتراکھنڈ، سب ہمالیائی مغربی بنگال اور سکم، آسام اور میگھالیہ، ناگالینڈ، منی پور، میزورم اور تریپورہ میں 5 جنوری تک گھنے کہرے کی صورتحال برقرار رہنے کی توقع ہے۔ آئی ایم ڈی کے مطابق اتر پردیش، بہار، پنجاب، ہریانہ، چندی گڑھ اور دہلی میں 7 جنوری تک گھنے کہرے کا امکان ہے، جبکہ مغربی راجستھان میں 4 جنوری تک ایسی ہی صورتحال رہ سکتی ہے۔ مشرقی راجستھان میں 2 سے 4 جنوری کے درمیان کہرا چھایا رہنے کی پیش گوئی کی گئی ہے۔

دریں اثنا، مدھیہ پردیش میں یکم جنوری تک گھنے کہرے کا امکان ہے، جبکہ 4 اور 5 جنوری کو ایک بار پھر کہرے کی نئی لہر آ سکتی ہے۔ آئی ایم ڈی کے مطابق گنگا کے میدانی مغربی بنگال میں 3 جنوری تک گھنے کہرے کی صورتحال رہ سکتی ہے۔ جمعرات کو دہلی میں زیادہ سے زیادہ درجہ حرارت 14 سے 16 ڈگری سیلسیس اور کم سے کم درجہ حرارت 9 سے 11 ڈگری سیلسیس کے درمیان رہنے کا امکان ہے۔ محکمہ موسمیات کے مطابق کم سے کم درجہ حرارت معمول سے 2 سے 4 ڈگری زیادہ جبکہ زیادہ سے زیادہ درجہ حرارت معمول سے خاصا کم رہے گا۔