نئی دہلی

قومی دارالحکومت میں ہفتہ کی صبح کم سے کم درجۂ حرارت میں اضافہ دیکھا گیا، جب کہ دو دن قبل ہلکی سے درمیانی بارش کے باعث درجۂ حرارت میں کمی آئی تھی۔محکمۂ موسمیاتِ ہند (آئی ایم ڈی) نے آئندہ دو دنوں کے لیے بارش اور گرج چمک کے امکانات کے پیش نظر پیلا الرٹ جاری کیا ہے۔

سفدرجنگ، جو شہر کا مرکزی موسمیاتی مرکز ہے، نے کم سے کم درجۂ حرارت 25.9 ڈگری سیلسیس ریکارڈ کیا، جو گزشتہ روز کے مقابلے میں 3.1 ڈگری زیادہ ہے۔ یہ معمول سے 1.2 ڈگری زیادہ بھی رہا۔دیگر موسمیاتی مراکز پر بھی کم سے کم درجۂ حرارت میں اسی طرح اضافہ دیکھا گیا۔

پالم میں کم سے کم درجۂ حرارت 23.6 ڈگری سیلسیس ریکارڈ کیا گیا، جو جمعہ کے مقابلے میں 2.3 ڈگری زیادہ ہے۔ لودھی روڈ پر 24.8 ڈگری سیلسیس درجۂ حرارت ریکارڈ ہوا، جو ایک دن پہلے کے مقابلے میں 3 ڈگری زیادہ ہے۔ ریج میں 3.3 ڈگری جبکہ آیانگر میں 4.2 ڈگری کا اضافہ دیکھا گیا۔

ریج اور آیانگر میں کم سے کم درجۂ حرارت بالترتیب 23.7 اور 25.6 ڈگری سیلسیس رہا۔محکمۂ موسمیات کے مطابق ہفتہ کو زیادہ سے زیادہ درجۂ حرارت 38 سے 40 ڈگری سیلسیس کے درمیان رہنے کا امکان ہے۔اسی دوران محکمۂ موسمیات نے آئندہ دو دنوں کے لیے پیلا الرٹ جاری کیا ہے۔

ایک افسر کے مطابق، اتوار کے روز بہت ہلکی سے ہلکی بارش کے ساتھ گرج چمک، بجلی اور 30 سے 40 کلومیٹر فی گھنٹہ کی رفتار سے تیز ہوائیں چلنے کا امکان ہے، جو جھکڑ کی صورت میں 50 کلومیٹر فی گھنٹہ تک پہنچ سکتی ہیں۔

اسی طرح کے موسمی حالات پیر کے روز بھی برقرار رہ سکتے ہیں۔دوسری جانب شہر کی فضائی آلودگی کی صورتحال معتدل درجے میں رہی، جہاں صبح 9 بجے ایئر کوالٹی انڈیکس  119 ریکارڈ کیا گیا، جو مرکزی آلودگی کنٹرول بورڈ (سی پی سی بی) کے اعداد و شمار کے مطابق ہے۔ جمعہ کو شام 4 بجے 24 گھنٹوں کا اوسط  اے کیو آئی 120 ریکارڈ کیا گیا تھا۔سی پی سی بی کے مطابق  اے کیو آءی کی درجہ بندی اس طرح ہے: 0-50 ‘اچھا’، 51-100 ‘اطمینان بخش’، 101-200 ‘معتدل’، 201-300 ‘خراب’، 301-400 ‘انتہائی خراب’ اور 401-500 ‘شدید’۔

دہلی کے لیے ایئر کوالٹی ارلی وارننگ سسٹم کے مطابق آئندہ چند دنوں تک  اے کیو آئی کے معتدل درجے میں رہنے کا امکان ہے۔