نئی دہلی۔ دیوالی سے قبل دارالحکومت میں شہریوں کے محفوظ اور پرامن جشن کو یقینی بنانے کے لیے دہلی پولیس نے جامع اور کئی سطحوں پر مشتمل سیکیورٹی انتظامات نافذ کیے ہیں۔ یہ بات دہلی پولیس کے ایک سرکاری بیان میں کہی گئی۔اہم بازاروں۔ بھیڑ والے عوامی مقامات اور بڑے تجارتی مراکز میں خصوصی سیکیورٹی اقدامات کیے گئے ہیں۔ دہلی پولیس نے تمام اضلاع میں مناسب تعداد میں اہلکار تعینات کیے ہیں۔ جنہیں مرکزی مسلح پولیس فورس کی مدد حاصل ہے تاکہ زمینی سطح پر سیکیورٹی مزید مضبوط بنائی جا سکے۔تہوار کے رش کے دوران بھاری ٹریفک کو سنبھالنے کے لیے دہلی ٹریفک پولیس نے زیادہ سے زیادہ اہلکاروں کو تعینات کیا ہے تاکہ ٹریفک کی روانی۔ پیدل چلنے والوں کی حفاظت۔ اور عوامی سہولت کو یقینی بنایا جا سکے۔ ٹریفک ایڈوائزری مسلسل جاری کی جا رہی ہیں جن میں پابندیوں۔ راستوں کی تبدیلی۔ پارکنگ کے مقامات اور مسافروں کے لیے اہم ہدایات شامل ہیں۔ حکام نے عوام سے اپیل کی ہے کہ وہ ٹریفک قوانین کی پابندی کریں۔ ہدایات پر عمل کریں۔ پبلک ٹرانسپورٹ کا استعمال کریں۔ اور ممکن ہو تو ذاتی گاڑیوں سے پرہیز کریں۔
دہلی پولیس بڑے بازاروں سمیت زیادہ بھیڑ والے علاقوں میں فلیگ مارچ بھی کر رہی ہے تاکہ عوام میں اعتماد پیدا کیا جا سکے اور اپنی تیاری کا مظاہرہ کیا جا سکے۔ دہلی پولیس اور مرکزی مسلح پولیس فورس نے آج چاندنی چوک کے مصروف علاقے میں مشترکہ فلیگ مارچ کیا۔تمام پولیس اضلاع میں عوامی تحفظ اور امن و امان کو برقرار رکھنے کے لیے پیدل گشت جاری ہے۔ پولیس اہلکاروں کی نمایاں موجودگی کا مقصد ممکنہ مجرموں کو روکنا اور بھیڑ والے علاقوں میں جرائم کی روک تھام کرنا ہے۔
اس کے علاوہ مصروف بازاروں۔ ریلوے اسٹیشنوں۔ اور بین الریاستی بس اڈوں پر بم ڈسپوزل ٹیموں اور ڈاگ اسکواڈ کی مدد سے تخریب کاری مخالف جانچ کی جا رہی ہے۔عوامی ہجوم کو منظم رکھنے کے لیے دہلی پولیس نے مارکیٹ ایسوسی ایشنز کے تعاون سے عارضی نگرانی کے برج قائم کیے ہیں۔ اور عوامی اعلان کے نظام نصب کیے ہیں تاکہ لوگوں کو ہدایات دی جا سکیں اور انہیں تہوار کے دوران چوکس رہنے کی تلقین کی جا سکے۔
اضافی ڈپٹی کمشنر پولیس رشی کمار سنگھ۔ اے سی پی کرول باغ۔ ایس ایچ او کرول باغ اور تھانے کے دیگر اہلکاروں نے تہوار کے موسم سے قبل علاقے میں پیدل گشت کیا۔ سیکیورٹی انتظامات کا زمینی جائزہ لیا گیا۔ اور عوامی سلامتی کو یقینی بنانے کے لیے ضروری ہدایات جاری کی گئیں۔
