نئی دہلی: دہلی پولیس نے آئی آر ایس افسر کی بیٹی اور یو پی ایس سی کی امیدوار کے ساتھ مبینہ عصمت دری، قتل اور ڈکیتی کے مقدمے میں 973 صفحات پر مشتمل چارج شیٹ عدالت میں داخل کر دی ہے۔ پولیس کے مطابق ملزم کے خلاف ثبوتوں میں سی سی ٹی وی فوٹیج، ڈی این اے پروفائلنگ، فنگر پرنٹ اور دیگر فارنسک شواہد شامل ہیں۔

پولیس کے مطابق یہ واردات 22 اپریل کو مشرقی کیلاش کے کیلاش ہلز علاقے میں، امر کالونی تھانے کی حدود میں پیش آئی تھی۔ مقتولہ، جو ایک آئی آر ایس افسر کی بیٹی اور یو پی ایس سی کی امیدوار تھیں، اپنے گھر میں مبینہ طور پر عصمت دری، قتل اور ڈکیتی کا شکار ہوئیں۔واقعے کے فوراً بعد مرکزی فارنسک سائنس لیبارٹری اور فارنسک سائنس لیبارٹری روہنی کی ماہر ٹیموں نے جائے وقوعہ کا معائنہ کیا۔ تفتیش کے دوران 100 سے زائد سی سی ٹی وی کیمروں کی فوٹیج کا جائزہ لیا گیا تاکہ ملزم کی آمد و رفت کا سراغ لگایا جا سکے۔

پولیس نے 23 سالہ راہل کمار مینا کو سی سی ٹی وی فوٹیج کی بنیاد پر شناخت کرکے اسی روز گرفتار کر لیا تھا۔ پولیس کا کہنا ہے کہ ملزم کی نشاندہی پر لوٹا گیا تمام سامان بھی برآمد کر لیا گیا۔تفتیش کے دوران جنوبی مشرقی ضلع کے سینئر افسران کی نگرانی میں کئی خصوصی ٹیمیں تشکیل دی گئیں۔ ان ٹیموں نے پڑوسیوں، سکیورٹی گارڈز، گھریلو ملازمین، مزدوروں، ڈرائیوروں، صفائی کارکنوں، آٹو رکشہ ڈرائیوروں اور دیگر افراد سے پوچھ گچھ کی۔ شواہد جمع کرنے کے لیے پولیس ٹیمیں راجستھان، ہریانہ، اتر پردیش اور دہلی کے مختلف علاقوں میں بھی بھیجی گئیں۔

گرفتاری کے بعد فارنسک ماہرین کی موجودگی میں جائے وقوعہ کی دوبارہ منظر کشی کی گئی۔ ملزم کے گھر میں داخل ہونے، اندر نقل و حرکت اور باہر نکلنے کے پورے عمل کی تصویری اور ویڈیو ریکارڈنگ کی گئی، جبکہ سی سی ٹی وی فوٹیج اور ان ویڈیوز کا چال کے انداز کے تجزیے کے لیے بھی استعمال کیا گیا۔

پولیس کے مطابق ملزم کا رویہ جاتی تجزیہ اور لیئرڈ وائس اینالیسس بھی کرایا گیا۔ جائے وقوعہ سے حاصل کیے گئے فنگر پرنٹس اور ہتھیلیوں کے نشانات ملزم سے مطابقت رکھتے ہیں۔مزید فارنسک جانچ میں ڈی این اے پروفائلنگ کے ذریعے بھی ملزم کے ڈی این اے کی مطابقت تفتیش کے دوران حاصل کیے گئے حیاتیاتی شواہد سے ثابت ہوئی۔

دہلی پولیس نے بتایا کہ تفتیش کے دوران بھارتیہ ناگرک سرکشا سنہتا کی دفعہ 183 کے تحت بیانات قلم بند کیے گئے، جبکہ استغاثہ نے مقدمے میں 82 گواہوں کو شامل کیا ہے۔تمام قانونی کارروائیاں مکمل کرنے کے بعد جنوبی مشرقی ضلع پولیس نے 16 جولائی کو 973 صفحات پر مشتمل چارج شیٹ متعلقہ عدالت میں داخل کر دی۔ اس مقدمے کی اگلی سماعت 18 جولائی کو مقرر ہے۔