نئی دہلی :دارالحکومت دہلی اور نیشنل کیپیٹل ریجن (این سی آر) میں جمعرات کی صبح فضائی معیار (AQI) "انتہائی خراب" زمرے میں درج کیا گیا، جبکہ گریڈیڈ رسپانس ایکشن پلان (جی آر اے پی) کے دوسرے مرحلے کے ضوابط پہلے ہی نافذ ہیں۔

مرکزی آلودگی کنٹرول بورڈ (CPCB) کے مطابق جمعرات صبح 6 بجے تک قومی دارالحکومت کا اوسط فضائی معیار انڈیکس (AQI) 362 ریکارڈ کیا گیا۔

جنوب مغربی دہلی کے آر کے پورم علاقے میں AQI 362 رہا، جو "انتہائی خراب" زمرے میں آتا ہے، جبکہ پٹپڑگنج میں بھی فضائی معیار 361 ریکارڈ ہوا۔

انڈیا گیٹ اور اس کے اطراف کے علاقوں میں AQI 353 درج کیا گیا، جو CPCB کے مطابق "انتہائی خراب" درجہ بندی میں آتا ہے۔

آل انڈیا انسٹی ٹیوٹ آف میڈیکل سائنسز (AIIMS) کے آس پاس AQI 342 رہا، جبکہ اکشردھام مندر کے قریب 350 ریکارڈ کیا گیا۔ آنند وہار کا فضائی معیار سب سے زیادہ خراب پایا گیا، جہاں انڈیکس 428 تک پہنچ گیا — جو "سنگین" (Severe) زمرے میں آتا ہے۔

دیوالی کے اگلے ہی دن، منگل کو بھی دہلی کی فضائی حالت "انتہائی خراب" ریکارڈ ہوئی۔ CPCB کے مطابق شام 4 بجے تک دہلی کا مجموعی AQI 351 تھا۔

ادھر، کمیشن فار ایئر کوالٹی مینجمنٹ (CAQM) نے این سی آر اور آس پاس کے علاقوں میں فضائی معیار اور موسمی حالات کا تفصیلی جائزہ لینے کے بعد جی آر اے پی کے دوسرے مرحلے کے تحت 12 نکاتی ایکشن پلان نافذ کرنے کا فیصلہ کیا، تاکہ آلودگی میں مزید اضافہ روکا جا سکے۔

ماہرینِ صحت نے بڑھتے ہوئے فضائی آلودگی کے اثرات پر تشویش ظاہر کی ہے، خاص طور پر بچوں، بزرگوں اور سانس کی بیماریوں میں مبتلا افراد کے لیے۔

اپولو اسپتال کے ماہر امراضِ تنفس ڈاکٹر نکھل مودی نے بتایا، "ہر سال سردیوں کے قریب آتے ہی AQI بڑھنے لگتا ہے کیونکہ درجہ حرارت کم ہونے سے ہوا کی رفتار گھٹ جاتی ہے، اور ٹھنڈی ہوا نیچے رک جاتی ہے، جس سے آلودگی زمین کی سطح پر جمع ہو جاتی ہے۔ دیوالی سے پہلے ہی ہم نے AQI میں اضافہ محسوس کیا تھا، اور اندازہ تھا کہ تہوار کے بعد یہ مزید بڑھے گا۔ جیسے ہی آلودگی بڑھتی ہے، الرجی اور پھیپھڑوں کے مریضوں کو سانس لینے میں دشواری، کھانسی، آنکھوں میں جلن اور دیگر مسائل کا سامنا ہوتا ہے۔"

دہلی کے ماحولیاتی وزیر منجندر سنگھ سرسا نے منگل کو کہا کہ حکومت فضائی آلودگی پر قابو پانے کے لیے اقدامات کر رہی ہے۔ انہوں نے بتایا کہ تعمیراتی سرگرمیوں میں 21 فیصد اضافہ اور گاڑیوں کی رجسٹریشن میں 8 فیصد اضافے کے باوجود آلودگی کی سطح تقریباً مستحکم رہی ہے۔

سرسا نے یہ بھی کہا کہ اس سال دیوالی کے بعد دہلی کی فضائی حالت گزشتہ برسوں کے مقابلے میں کافی بہتر رہی۔
انہوں نے اعداد و شمار پیش کرتے ہوئے بتایا:
2020 (عام آدمی پارٹی کے دور میں): AQI 462
2024 میں: AQI 360
اور 2025 میں: AQI 351۔