نئی دہلی: ایک افسوسناک سڑک حادثے میں 23 سالہ ساحل دھنیشرہ جاں بحق ہوگیا، جس کے بعد اس کی والدہ اِنّا مکان نے انصاف کی اپیل کی ہے۔ یہ واقعہ دوارکا کے علاقے دوارکا ساؤتھ میں لال بہادر شاستری کالج کے قریب پیش آیا۔

والدہ کے مطابق 3 فروری کو ان کا بیٹا دفتر جا رہا تھا کہ ایک اسکارپیو گاڑی، جسے مبینہ طور پر ایک نابالغ چلا رہا تھا، تیز رفتاری سے مخالف سمت میں آئی۔ انہوں نے الزام لگایا کہ ڈرائیور اپنی بہن کے ساتھ سڑک پر خطرناک کرتب دکھاتے ہوئے ویڈیو بنا رہا تھا اور گاڑی کی رفتار بے قابو تھی۔ بس کے قریب مخالف لین میں کرتب کے دوران گاڑی نے ساحل کی موٹر سائیکل کو ٹکر ماری، پھر ایک کھڑی گاڑی اور بعد میں ایک ٹیکسی سے جا ٹکرائی۔ خاندان کا کہنا ہے کہ تصادم کے بعد بھی ڈرائیور نے بریک نہیں لگائی۔

حادثے میں ایک ٹیکسی ڈرائیور بھی شدید زخمی ہوا جسے اسپتال منتقل کیا گیا۔ بس ڈرائیور موقع سے چلا گیا جبکہ لوگوں نے مبینہ نابالغ ڈرائیور کو پکڑ لیا۔ پولیس کے مطابق تین گاڑیاں اور ایک موٹر سائیکل بری طرح تباہ حالت میں پائی گئیں اور ساحل موقع پر ہی دم توڑ چکا تھا۔

دہلی پولیس نے بتایا کہ دوارکا ساؤتھ تھانے میں متعلقہ دفعات کے تحت مقدمہ درج کیا گیا ہے۔ ابتدائی جانچ کے مطابق کار نے مخالف سمت سے آتی موٹر سائیکل کو ٹکر ماری اور پھر ایک کھڑی گاڑی سے جا ٹکرائی۔ پولیس نے علاقے کی نگرانی کیمروں کی ریکارڈنگ حاصل کر لی ہے اور تمام گاڑیوں کو ضبط کر کے جانچ مکمل کر لی گئی ہے۔

پولیس کا کہنا ہے کہ ملزم کے پاس ڈرائیونگ لائسنس نہیں تھا اور اسے موقع پر ہی حراست میں لے کر جووینائل جسٹس بورڈ کے سامنے پیش کیا گیا جہاں سے اسے عبوری ضمانت دے دی گئی۔

مرحوم کی والدہ نے سخت کارروائی کا مطالبہ کرتے ہوئے کہا کہ ملزم پر پہلے بھی تیز رفتاری کے کئی چالان تھے لیکن اس کے والد نے اسے گاڑی چلانے سے نہیں روکا۔ ان کا کہنا تھا کہ یہ محض حادثہ نہیں بلکہ مجرمانہ ذہنیت کا نتیجہ ہے کیونکہ ملزمان ویڈیو بنانے کے لیے جان بوجھ کر خطرناک کرتب کر رہے تھے۔ انہوں نے کہا کہ اگر سخت کارروائی نہ کی گئی تو سڑکوں پر چلنے والا ہر شہری غیر محفوظ رہے گا۔

پولیس کے مطابق مزید تفتیش جاری ہے۔