نئی دہلی: دہلی پولیس نے گزشتہ ہفتے سپریم کورٹ میں سماعت کے دوران ہنگامہ آرائی کے معاملے میں دو قانون کے طلبہ کو گرفتار کر لیا ہے۔ پولیس نے مرکزی ملزم کے خلاف ایف آئی آر درج کرتے ہوئے الزام عائد کیا ہے کہ اس نے عدالتی کارروائی میں خلل ڈالا اور ڈیوٹی پر مامور سکیورٹی اہلکاروں کے ساتھ بدتمیزی اور ہاتھاپائی کی۔

پولیس کے مطابق یہ واقعہ 10 جولائی کو سپریم کورٹ کے کورٹ نمبر 13 میں اس وقت پیش آیا جب پربل پرتاپ اور ایک دیگر بنام ریاست اتر پردیش مقدمے کی سماعت جاری تھی۔ اس سلسلے میں سپریم کورٹ کے ایک سکیورٹی اہلکار کی شکایت پر تلک مارگ پولیس اسٹیشن میں مقدمہ درج کیا گیا۔

ایف آئی آر کے مطابق مرکزی ملزم پربل پرتاپ سنگھ (24)، جو لکھنؤ یونیورسٹی میں ایل ایل بی کے تیسرے سال کا طالب علم ہے، مقدمے میں پیٹیشنر اِن پرسن (اپنا مقدمہ خود لڑنے والا درخواست گزار) کے طور پر پیش ہوا تھا۔

پولیس کا الزام ہے کہ سماعت کے دوران پربل پرتاپ سنگھ نے جان بوجھ کر عدالتی کارروائی میں خلل ڈالا، غیر پارلیمانی اور نازیبا زبان استعمال کی، عدالت کے اندر کاغذات اچھالے اور ہنگامہ برپا کیا۔ جب عدالت کے عملے نے نظم و ضبط برقرار رکھنے اور اسے روکنے کی کوشش کی تو اس نے سکیورٹی اہلکار کے ساتھ زور زبردستی کی، جس سے سرکاری فرائض کی انجام دہی میں رکاوٹ پیدا ہوئی۔

دہلی پولیس نے بتایا کہ اس معاملے میں ایک اور ملزم چندر بھان (23)، جو لکھنؤ یونیورسٹی میں قانون کے دوسرے سال کا طالب علم ہے، کو بھی گرفتار کیا گیا ہے۔

پولیس نے اس معاملے میں بھارتیہ نیائے سنہتا (BNS) کی دفعات 132، 221، 224 اور 3(5) سمیت دیگر متعلقہ دفعات کے تحت مقدمہ درج کیا ہے۔

پولیس کے مطابق واقعے کی مزید تفتیش جاری ہے۔