نئی دہلی: عام آدمی پارٹی کے قومی کنوینر اور دہلی کے سابق وزیر اعلیٰ اروند کیجریوال۔ سماجوادی پارٹی کی رکن پارلیمنٹ ڈمپل یادو اور متعدد اپوزیشن رہنماؤں نے جمعرات کو سماجی کارکن سونم وانگچک سے ملاقات کر کے ان کے ساتھ یکجہتی کا اظہار کیا۔ سونم وانگچک این ای ای ٹی۔ یو جی پرچہ افشا معاملے میں مرکزی وزیر تعلیم دھرمیندر پردھان کے استعفے کے مطالبے پر گزشتہ 19 دنوں سے بھوک ہڑتال پر ہیں۔

جنتر منتر پر جاری نوجوانوں کی تحریک سے خطاب کرتے ہوئے اروند کیجریوال نے کہا کہ مرکزی حکومت نوجوانوں کی آواز اور سونم وانگچک کے مطالبات کو سنجیدگی سے سنے۔ انہوں نے خبردار کیا کہ اگر حکومت نے عوامی جذبات کو نظر انداز کیا تو اسے بھی 2014 میں کانگریس کی قیادت والی متحدہ ترقی پسند اتحاد حکومت جیسا انجام دیکھنا پڑ سکتا ہے۔

کیجریوال نے دھرمیندر پردھان کے استعفے کا مطالبہ کرتے ہوئے کہا کہ وزیر اعظم کو چاہیے کہ وہ انہیں عہدے سے ہٹائیں اور سونم وانگچک کو ملک کا نیا مرکزی وزیر تعلیم مقرر کریں۔

سماجوادی پارٹی کی رکن پارلیمنٹ ڈمپل یادو نے بھی حکومت سے اپیل کی کہ وہ حساسیت کا مظاہرہ کرے اور سونم وانگچک سے بات چیت کا آغاز کرے۔ انہوں نے کہا کہ اگر حکومت خود کو سناتن دھرم کی علمبردار قرار دیتی ہے تو اسے ہمدردی اور انسان دوستی کا بھی مظاہرہ کرنا چاہیے۔

سماجوادی پارٹی کی رکن پارلیمنٹ روچی ویرا نے کہا کہ سونم وانگچک اپنی ذات کے لیے نہیں بلکہ ملک کے نوجوانوں کے مستقبل کے لیے جدوجہد کر رہے ہیں۔ انہوں نے افسوس ظاہر کیا کہ اتنے دن گزرنے کے باوجود حکومت کا کوئی نمائندہ ان سے بات کرنے نہیں پہنچا۔

شیو سینا ادھو ٹھاکرے گروپ کی ترجمان سشمہ اندھارے نے بھی سونم وانگچک سے ملاقات کر کے تحریک کی حمایت کا اعلان کیا۔

شیو سینا ادھو ٹھاکرے گروپ کے رہنما آدتیہ ٹھاکرے نے سوشل میڈیا پر حکومت پر تنقید کرتے ہوئے کہا کہ سونم وانگچک کی بھوک ہڑتال کے تئیں حکومت کا رویہ اس بات کا ثبوت ہے کہ اسے ملک کے نوجوانوں کی کوئی فکر نہیں۔ انہوں نے الزام لگایا کہ این ای ای ٹی پرچہ افشا جیسے سنگین معاملے پر دھرمیندر پردھان کو جواب دہ بنایا جانا چاہیے اور انہیں وزارت سے ہٹا دینا چاہیے۔

کسان رہنما راکیش ٹکیت بھی جنتر منتر پہنچے اور احتجاج کرنے والے طلبہ و نوجوانوں کی حمایت کا اظہار کیا۔

کانگریس نے بھی سونم وانگچک کی تحریک کی تائید کرتے ہوئے دھرمیندر پردھان کے استعفے کا مطالبہ دہرایا۔ کانگریس کے جنرل سکریٹری کے سی وینوگوپال نے کہا کہ ان کی جماعت گزشتہ ڈیڑھ ماہ سے وزیر تعلیم کے استعفے کا مطالبہ کر رہی ہے اور سونم وانگچک کے خدشات سے مکمل اتفاق رکھتی ہے۔ تاہم انہوں نے وانگچک سے ان کی صحت کے پیش نظر بھوک ہڑتال ختم کرنے کی بھی اپیل کی۔

کانگریس رہنما دنیش گنڈو راؤ نے مرکزی حکومت کو متکبر۔ بے حس اور عوامی مسائل سے لاتعلق قرار دیتے ہوئے کہا کہ موجودہ حکومت عوام کی آواز سننے پر یقین نہیں رکھتی۔ انہوں نے بھی سونم وانگچک سے اپیل کی کہ وہ اپنی بھوک ہڑتال ختم کریں کیونکہ اس جدوجہد کو آگے بھی جاری رکھنا ضروری ہے۔

دوسری جانب کانگریس نے راہل گاندھی کی قیادت میں "چھاتروں کی گونج" مہم بھی شروع کر رکھی ہے جس کے تحت مختلف امتحانات میں مبینہ بے ضابطگیوں کے خلاف احتجاج کیا جا رہا ہے۔

ادھر دہلی ہائی کورٹ نے سونم وانگچک کی صحت کے حوالے سے دائر مفاد عامہ کی درخواست پر سماعت کرتے ہوئے ہدایت دی ہے کہ ان کی طبی حالت کی روزانہ طبی جانچ کی جائے۔ چیف جسٹس دیویندر کمار اُپادھیائے اور جسٹس تیجس کریا پر مشتمل بنچ نے کہا کہ ہر شہری کی جان قیمتی ہے اور حکومت کی ذمہ داری ہے کہ اگر سرکاری ڈاکٹروں کی رائے میں کسی طبی مداخلت کی ضرورت ہو تو اس میں کسی قسم کی تاخیر نہ کی جائے۔

واضح رہے کہ سونم وانگچک طلبہ کے مختلف گروپوں کے ساتھ مل کر این ای ای ٹی۔ یو جی پرچہ افشا معاملے میں جواب دہی کا مطالبہ کرتے ہوئے بھوک ہڑتال کی قیادت کر رہے ہیں۔ اس احتجاج میں کرانتیکاری یووا سنگٹھن۔ آل انڈیا اسٹوڈنٹس ایسوسی ایشن اور اسٹوڈنٹس فیڈریشن آف انڈیا سمیت کئی طلبہ تنظیمیں بھی شریک ہیں۔