نئی دہلی: دہلی ہائی کورٹ نے قومی دارالحکومت میں آوارہ کتوں کے انتظام سے متعلق سپریم کورٹ کی ہدایات پر عمل درآمد کی نگرانی کے لیے ازخود مفادِ عامہ کی ایک درخواست (سوموٹو پی آئی ایل) شروع کر دی ہے۔ یہ کارروائی سپریم کورٹ کی اس ہدایت کے بعد شروع کی گئی، جس میں ملک کی تمام ہائی کورٹس سے کہا گیا تھا کہ وہ اپنی اپنی حدود میں ازخود مقدمات درج کرکے ان احکامات پر عمل درآمد کی نگرانی کریں۔

سپریم کورٹ نے ریاستوں کے چیف سیکریٹریوں کو بھی ان ہدایات پر عمل درآمد کا ذاتی طور پر ذمہ دار قرار دیا تھا۔ جسٹس دنیش مہتا اور جسٹس رجنیش کمار گپتا پر مشتمل ڈویژن بنچ نے دہلی حکومت، میونسپل کارپوریشن آف دہلی (ایم سی ڈی) اور مرکزی حکومت کو نوٹس جاری کیے۔ عدالت نے دہلی حکومت اور ایم سی ڈی کو ہدایت دی کہ وہ 31 جولائی تک سپریم کورٹ کے احکامات پر عمل درآمد کے لیے کیے گئے اقدامات کی تفصیلی رپورٹ پیش کریں۔

یہ رپورٹ آئندہ سماعت سے ایک روز قبل عدالت میں جمع کرانے کا حکم دیا گیا ہے۔ سماعت کے دوران عدالت نے آوارہ کتوں کی افزائش پر قابو پانے، نس بندی، ریبیز سے بچاؤ کی ویکسینیشن، شہر میں موجود کتوں کی پناہ گاہوں اور ڈاگ پاؤنڈز کی تعداد سے متعلق تفصیلات بھی طلب کیں۔ جب دہلی حکومت کے وکیل نے بتایا کہ متعلقہ ادارے اس معاملے پر کام کر رہے ہیں تو عدالت نے آوارہ کتوں کی بڑھتی ہوئی تعداد پر تشویش ظاہر کی۔

بنچ نے ریمارکس دیے، ’’آوارہ کتوں کی تعداد بہت زیادہ ہے۔ ہائی کورٹ کے احاطے میں بھی کالر پہنے کئی کتے نظر آتے ہیں۔ کیا یہ تربیت یافتہ ہیں؟ کیا ہائی کورٹ ان کی مالک ہے؟ جب بھی میں ایس بلاک جاتا ہوں وہاں کئی کتے دکھائی دیتے ہیں۔ معلوم نہیں یہ پالتو ہیں یا نہیں، لیکن یہ مقامی نسل کے کتے ہیں۔‘‘ عدالت نے کہا کہ اس معاملے میں جانوروں کی فلاح اور عوامی تحفظ، دونوں کے درمیان توازن قائم کرنا ضروری ہے۔

بنچ نے کہا، ’’راجستھان میں دو گروہ ہیں، ایک پالتو جانوروں کے خلاف اور دوسرا کتوں سے محبت کرنے والوں کا۔ آج کل کتوں سے محبت کرنے والوں اور مخالفت کرنے والوں کے درمیان بڑا تنازع ہے، جبکہ عام شہری سب سے زیادہ متاثر ہو رہا ہے۔ روزانہ کتے کے کاٹنے کے واقعات پیش آتے ہیں، اور بندروں کا مسئلہ تو اس سے بھی زیادہ سنگین ہے۔‘‘ عدالت نے اس معاملے کی آئندہ سماعت 3 اگست مقرر کی ہے۔

یہ کارروائی سپریم کورٹ کے 19 مئی 2026 کے فیصلے کے تناظر میں کی جا رہی ہے، جس میں آوارہ کتوں کے مسئلے سے نمٹنے کے لیے متعدد ہدایات جاری کی گئی تھیں۔ سپریم کورٹ نے قرار دیا تھا کہ اسکولوں، اسپتالوں، بس اڈوں، ریلوے اسٹیشنوں اور دیگر عوامی مقامات سے ہٹائے گئے آوارہ کتوں کو نس بندی اور ویکسینیشن کے بعد دوبارہ انہی مقامات پر نہ چھوڑا جائے۔ عدالتِ عظمیٰ نے قانون کے مطابق ریبیز سے متاثرہ یا انتہائی جارحانہ کتوں کو تلف کرنے کی اجازت بھی دی تھی اور عوامی مقامات پر ان کے لیے مخصوص خوراکی مقامات قائم کرنے کی ہدایت جاری کی تھی۔

سپریم کورٹ نے تمام ہائی کورٹس کو ان احکامات پر عمل درآمد کی نگرانی کے لیے ازخود مقدمات درج کرنے اور خلاف ورزی کی صورت میں توہینِ عدالت سمیت مناسب کارروائی کا اختیار بھی دیا تھا، جبکہ ریاستی چیف سیکریٹریوں کو مؤثر عمل درآمد کا ذاتی طور پر ذمہ دار قرار دیا گیا تھا۔