نئی دہلی/ آواز دی وائس

دہلی ہائی کورٹ نے آئی آر ایس افسر اور سابق این سی بی زونل ڈائریکٹر سمیر وانکھیڑے کی ترقی سے متعلق ایک معاملے میں مرکز کو سخت پھٹکار لگائی ہے۔ ہائی کورٹ نے اس درخواست پر، جس میں متعلقہ حکم کی نظرثانی کی مانگ کی گئی تھی، کچھ اہم حقائق چھپانے کے لیے مرکزی حکومت پر 20 ہزار روپے کا جرمانہ عائد کیا ہے۔ عدالت نے پایا کہ مرکزی حکومت نے سی اے ٹی (مرکزی انتظامی ٹریبونل) کے حکم سے متعلق ضروری معلومات چھپائی تھیں، جس سے عدالتی کارروائی متاثر ہو سکتی تھی۔

جسٹس نوین چاولا کی سربراہی والی بینچ نے مرکز کی اس نظرثانی درخواست کو خارج کر دیا، جس میں مرکزی انتظامی ٹریبونل (سی اے ٹی) کے اُس حکم پر نظرِ ثانی کی مانگ کی گئی تھی، جس کے تحت وانکھیڑے کو ترقی دینے کا فیصلہ کیا گیا تھا۔

دہلی ہائی کورٹ نے اس معاملے میں مرکزی انتظامی ٹریبونل کے دیے گئے حکم کو برقرار رکھا ہے۔ سی اے ٹی نے پہلے ہی سمیر وانکھیڑے کے خلاف جاری تمام محکماتی کارروائیوں پر روک لگا دی تھی، جس کے بعد وانکھیڑے کو ترقی سے متعلق راحت ملی تھی۔  اس حکم کے خلاف مرکزی حکومت نے دہلی ہائی کورٹ میں نظرِ ثانی درخواست دائر کی تھی۔ سماعت کے دوران وانکھیڑے کے وکیل نے عدالت کو بتایا کہ مرکزی حکومت نے اپنی اپیل میں یہ حقیقت چھپا لی کہ سی اے ٹی نے وانکھیڑے کے خلاف تمام محکماتی کارروائیوں پر روک لگا دی تھی۔

عدالت نے پایا کہ حکومت کی جانب سے یہ معلومات نہ دینا ایک سنگین غلطی ہے۔ اس کے بعد دہلی ہائی کورٹ نے مرکزی حکومت کی نظرِ ثانی درخواست کو خارج کرتے ہوئے اس پر 20 ہزار روپے کا جرمانہ عائد کیا۔  یہ بات قابلِ ذکر ہے کہ سمیر وانکھیڑے فی الحال وزارتِ خزانہ کے ریونیو ڈپارٹمنٹ میں ایڈیشنل کمشنر کے طور پر تعینات ہیں۔ اکتوبر 2021 میں وہ اس وقت سرخیوں میں آئے جب انہوں نے اداکار شاہ رخ خان کے بیٹے آریان خان کو ایک کروز جہاز پر مبینہ ریو پارٹی کے معاملے میں گرفتار کیا تھا۔ اُس وقت وانکھیڑے نارکوٹکس کنٹرول بیورو (این سی بی) کے ممبئی زونل ڈائریکٹر تھے۔

وانکھیڑے پر منی لانڈرنگ کے الزامات کے سلسلے میں سی بی آئی اور ای ڈی کی تحقیقات بھی جاری ہیں۔ دونوں کیسز 2023 میں درج کیے گئے تھے، اور جولائی میں بمبئی ہائی کورٹ نے سی بی آئی کو تحقیقات مکمل کرنے کے لیے تین ماہ کی مہلت دی تھی۔