نئی دہلی: دہلی ہائی کورٹ نے جمعرات کو اولمپک تمغہ یافتہ پہلوان سشیل کمار کی مئی 2021 کے ساگر ڈھنکر قتل کیس میں باقاعدہ ضمانت کی درخواست مسترد کر دی۔ جسٹس پروشینڈر کمار کوراو نے سشیل کمار کی درخواست خارج کر دی۔ عدالت کا تفصیلی حکم ابھی جاری ہونا باقی ہے۔

سشیل کمار نے اپنے وکیل سہیل ملک کے ذریعے دہلی ہائی کورٹ میں ضمانت کی درخواست دائر کرتے ہوئے مؤقف اختیار کیا تھا کہ مقدمے کے حالات بدل چکے ہیں، کیونکہ استغاثہ کے تمام اہم گواہوں کے بیانات روہنی عدالت میں قلم بند کیے جا چکے ہیں۔ اس سے قبل 6 فروری کو روہنی عدالت بھی ان کی ضمانت کی درخواست مسترد کر چکی تھی۔ ٹرائل کورٹ میں مقتول کے والد کی جانب سے وکیل جوشنی تولی نے ضمانت کی مخالفت کی تھی۔

یاد رہے کہ مارچ 2025 میں دہلی ہائی کورٹ نے سشیل کمار کو باقاعدہ ضمانت دی تھی، تاہم 13 اگست 2025 کو سپریم کورٹ نے یہ کہتے ہوئے ضمانت منسوخ کر دی تھی کہ ابھی اہم گواہوں کے بیانات باقی ہیں۔ اس کے بعد سشیل کمار نے 20 اگست 2025 کو خود کو حکام کے حوالے کر دیا تھا۔

سشیل کمار کے وکیل نے عدالت میں کہا کہ اب حالات یکسر بدل چکے ہیں، کیونکہ تمام اہم عوامی گواہوں کے بیانات مکمل ہو چکے ہیں، اس لیے استغاثہ کے شواہد پر اثرانداز ہونے یا ان میں رد و بدل کا کوئی امکان نہیں رہا۔ انہوں نے یہ بھی کہا کہ سپریم کورٹ نے سشیل کمار کو یہ آزادی دی تھی کہ اگر حالات تبدیل ہوں یا کوئی نیا جواز پیدا ہو تو وہ متعلقہ عدالت میں دوبارہ ضمانت کی درخواست دائر کر سکتے ہیں۔

درخواست کے مطابق اس مقدمے میں استغاثہ کے 222 گواہ ہیں، جن میں سے 42 اہم عوامی گواہوں، بشمول زخمی افراد، کے بیانات ریکارڈ کیے جا چکے ہیں۔ درخواست میں کہا گیا تھا کہ مقدمہ اس وقت استغاثہ کے شواہد ریکارڈ کرنے کے مرحلے میں ہے، اس لیے سشیل کمار کو مزید عدالتی حراست میں رکھنا بے فائدہ ہے، خصوصاً اس لیے کہ انہیں عادی مجرموں کے ساتھ رکھا جا رہا ہے، جس سے ان کی صحت بھی متاثر ہو رہی ہے۔

استغاثہ کے مطابق 4 اور 5 مئی 2021 کی درمیانی شب تقریباً 11:30 بجے جے بھگوان عرف سونو، ساگر ڈھنکر، رویندر عرف بندا، بھگت عرف بھگتو اور امیت کمار عرف کھاگڑ کو شالیمار باغ اور ماڈل ٹاؤن سے مبینہ طور پر اغوا کر کے دہلی کے چھترسال اسٹیڈیم کی پارکنگ میں لے جایا گیا، جہاں سشیل کمار اور ان کے ساتھیوں نے ان پر حملہ کیا۔ شدید زخمی ہونے والے ساگر ڈھنکر بعد میں دورانِ علاج دم توڑ گئے۔ سشیل کمار کو ارجن ایوارڈ (2005)، راجیو گاندھی کھیل رتن ایوارڈ (2009) اور پدم شری (2011) سے بھی نوازا جا چکا ہے۔