نئی دہلی: دہلی ہائی کورٹ نے معافی کےحق (Right to Be Forgotten) کو آئین کے آرٹیکل 21 کے تحت حاصل بنیادی حقِ رازداری (Privacy) کا ایک لازمی حصہ قرار دیتے ہوئے کہا ہے کہ کسی فرد کو صرف اس وجہ سے مسلسل شہرتی اور ذاتی نقصان برداشت کرنے پر مجبور نہیں کیا جا سکتا کہ اس سے متعلق معلومات ڈیجیٹل دنیا میں غیر معینہ مدت تک قابلِ تلاش (Searchable) رہیں۔ آن لائن عدالتی ریکارڈز اور انٹرنیٹ سرچ نتائج تک رسائی سے متعلق متعدد درخواستوں پر اہم فیصلہ سناتے ہوئے جسٹس سچن دتہ نے کہا کہ ڈیجیٹل دور میں رازداری محض معلومات کو خفیہ رکھنے کا نام نہیں بلکہ اس بات پر فرد کے اختیار کا نام ہے کہ اس کی ذاتی معلومات کس حد تک اور کس مقصد کے لیے پھیلائی جائیں۔

عدالت نے قرار دیا کہ معلوماتی رازداری (Informational Privacy) میں معلوماتی خود اختیاری (Informational Self-Determination) بھی شامل ہے، یعنی ہر شخص کو یہ حق حاصل ہے کہ وہ فیصلہ کرے کہ اس کے بارے میں کون سی معلومات ظاہر کی جائیں، کس کے سامنے ظاہر کی جائیں اور کس مقصد کے لیے استعمال ہوں۔

عدالت نے مشاہدہ کیا کہ آن لائن معلومات کی مستقل دستیابی روزگار کے مواقع، پیشہ ورانہ ترقی، سماجی حیثیت، ذاتی تعلقات اور انسانی وقار پر منفی اثرات مرتب کر سکتی ہے۔ عدالت کے مطابق حقِ فراموشی ایک آئینی ردِعمل کے طور پر سامنے آیا ہے، کیونکہ ڈیجیٹل ریکارڈ اکثر ہمیشہ کے لیے قابلِ رسائی رہتے ہیں، چاہے ان کی مسلسل دستیابی کا عوامی مفاد سے کوئی خاص تعلق نہ ہو۔ رازداری اور عدالتی شفافیت (Open Justice) کے درمیان توازن پر گفتگو کرتے ہوئے عدالت نے واضح کیا کہ عدالتی کارروائیوں میں شفافیت کا مطلب یہ نہیں کہ افراد ہمیشہ کے لیے انٹرنیٹ پر نام کی بنیاد پر قابلِ شناخت رہیں۔