نئی دہلی

دہلی ہائی کورٹ نے جمعہ کو کہا کہ وہ کانگریس رکن پارلیمنٹ ششی تھرور کے شخصی حقوق کے تحفظ کے لیے عبوری حکم جاری کرے گی۔جسٹس منی پشکرنا نے عبوری حکم امتناعی کی درخواست اور سمن جاری کرتے ہوئے حکم کے دوران کہا کہ عدالت کئی مطالبات کے مطابق احکامات جاری کرے گی۔عدالت ششی تھرور کی جانب سے دائر اس دیوانی مقدمے کی سماعت کر رہی تھی، جس میں سوشل میڈیا پر گردش کرنے والی مبینہ اے آئی سے تیار کردہ ڈیپ فیک ویڈیوز کے خلاف شخصی حقوق کے تحفظ کی درخواست کی گئی ہے۔

ششی تھرور کی جانب سے سینئر وکیل امت سبل پیش ہوئے۔ انہوں نے عدالت کو بتایا کہ مصنوعی ذہانت کے ذریعے تیار کی گئی جعلی ویڈیوز میں کانگریس رہنما کے چہرے، آواز، تاثرات اور بولنے کے انداز کی نقل کی گئی ہے۔سماعت کے دوران امت سبل نے کہا کہ یہ معاملہ کسی فرد کے شخصی حقوق اور ساکھ کے تحفظ سے متعلق ہے۔ انہوں نے کہا کہ یہ کوئی کمپنی نہیں جو ٹریڈ مارک کے تحفظ کی درخواست کر رہی ہو، بلکہ ایک فرد ہے۔درخواست کے مطابق ششی تھرور کو مارچ 2026 کے آس پاس معلوم ہوا کہ اے آئی اور مشین لرننگ ٹولز کا استعمال کرتے ہوئے انتہائی حقیقت سے قریب جعلی ویڈیوز بنائی جا رہی ہیں، جن میں انہیں سیاسی طور پر حساس بیانات دیتے ہوئے دکھایا گیا۔درخواست میں خاص طور پر ایسی ویڈیوز کا ذکر کیا گیا جن میں مبینہ طور پر انہیں پاکستان کی سفارتی حکمت عملی کی تعریف کرتے اور ہندوستانی مفادات کے خلاف تبصرے کرتے دکھایا گیا۔امت سبل نے عدالت کو بتایا کہ فیکٹ چیکرز اور میڈیا اداروں کی جانب سے ویڈیوز کو جعلی قرار دیے جانے کے باوجود یہ مواد آن لائن گردش کرتا رہا اور عوامی رائے کو متاثر کرتا رہا۔

انہوں نے کہا کہ اس حوالے سے الیکٹرانکس و اطلاعاتی ٹیکنالوجی کی وزارت، دہلی پولیس اور سوشل میڈیا پلیٹ فارمز کو اطلاعاتی ٹیکنالوجی قوانین کے تحت شکایات بھیجی گئی تھیں۔امت سبل نے کہا کہ ویڈیوز ہٹائے جانے کے باوجود وہ مختلف لنکس اور یو آر ایل کے ذریعے دوبارہ سامنے آ جاتی ہیں۔ انہوں نے کہا کہ یہ ہمیشہ مختلف یو آر ایل پر موجود ہوتی ہیں۔ یہ تین الگ لنکس پر ایک ہی جیسی ڈیپ فیک ویڈیوز ہیں۔

انہوں نے مزید کہا کہ ان ویڈیوز سے نہ صرف ششی تھرور کی ذاتی ساکھ متاثر ہوئی بلکہ عالمی سطح پر ہندوستان کی شبیہ پر بھی اثر پڑا۔ انہوں نے عدالت میں کہا کہ انہوں نے میری شخصیت کا غلط استعمال کرتے ہوئے دوسرے ملک کی تعریف والی ویڈیوز تیار کیں، جس سے مجھے نقصان پہنچا۔ میں خارجہ امور کا وزیر رہ چکا ہوں، اس لیے یہ ہندوستان کی ساکھ کا بھی معاملہ ہے۔

میٹا کی جانب سے پیش ہونے والے وکیل نے عدالت کو بتایا کہ درخواست میں شامل انسٹاگرام لنکس کو جمعہ کی صبح ناقابل رسائی بنا دیا گیا ہے۔ تاہم امت سبل نے کہا کہ یہ لنکس گزشتہ شام تک فعال تھے۔

اسی نوعیت کے مستقبل کے مواد کے خلاف متحرک حکم امتناعی کی درخواست پر غور کرتے ہوئے عدالت نے کہا کہ اگر یکساں مواد دوبارہ سامنے آئے تو مدعی کو متعلقہ پلیٹ فارمز سے رجوع کرنے کی آزادی دی جائے گی۔بعد ازاں دہلی ہائی کورٹ نے معاملے میں نوٹس جاری کرتے ہوئے چار ہفتوں میں جواب داخل کرنے کی ہدایت دی اور مقدمے کو باضابطہ طور پر رجسٹر کرنے کے ساتھ سمن جاری کرنے کا حکم دیا۔

ششی تھرور نے عدالت سے مستقل حکم امتناعی کی درخواست کی ہے تاکہ مدعا علیہان اور ان کی جانب سے کام کرنے والے افراد کو اے آئی، ڈیپ فیک، مورفنگ یا وائس کلوننگ ٹیکنالوجی کے ذریعے ان کا نام، شناخت، تصویر، آواز، تاثرات اور دیگر شخصی خصوصیات استعمال کرنے، شائع کرنے یا پھیلانے سے روکا جا سکے۔درخواست میں یہ بھی مطالبہ کیا گیا ہے کہ مبینہ خلاف ورزی والے مواد، بشمول ڈیپ فیک ویڈیوز، تبدیل شدہ تصاویر، اے آئی سے تیار کردہ آڈیو ویژول مواد، جعلی پروفائلز اور فرضی پوسٹس کو فوری طور پر ہٹایا اور بلاک کیا جائے۔

ششی تھرور نے اپنی ساکھ اور نیک نامی کو پہنچنے والے مبینہ نقصان کے لیے 2 کروڑ 5 ہزار روپے ہرجانے کا مطالبہ بھی کیا ہے۔درخواست میں ایکس کارپوریشن اور میٹا پلیٹ فارمز سے مطالبہ کیا گیا ہے کہ وہ مبینہ خلاف ورزی والے مواد تک رسائی بند کریں، ایسے افراد کی شناخت ظاہر کریں جو یہ مواد تیار اور پھیلا رہے ہیں، اور ششی تھرور کے نام سے چلنے والے جعلی اکاؤنٹس مستقل طور پر بند کریں۔

الیکٹرانکس و اطلاعاتی ٹیکنالوجی کی وزارت اور محکمہ ٹیلی مواصلات کو بھی فریق بنایا گیا ہے، جبکہ درخواست میں مزید جعلی مواد کی روک تھام اور بلاکنگ کے احکامات مانگے گئے ہیں۔مقدمے میں آئین کے آرٹیکل 19 اور 21 کے تحت شخصی اور تشہیری حقوق کی خلاف ورزی کے ساتھ ساتھ شناخت کے غلط استعمال اور ساکھ خراب کرنے کے الزامات بھی شامل ہیں۔ درخواست میں اطلاعاتی ٹیکنالوجی قانون 2000 اور ہندوستانی نیائے سنہتا 2023 کی ان دفعات کا بھی حوالہ دیا گیا ہے جو شناختی چوری اور جعلسازی سے متعلق ہیں۔