نئی دہلی/ آواز دی وائس

دہلی پولیس نے بدھ کے روز ترکمان گیٹ میں پتھراؤ کے واقعے کے سلسلے میں نامعلوم افراد کے خلاف ایف آئی آر درج کر لی ہے۔ یہ واقعہ اُس وقت پیش آیا جب علاقے میں سرکاری کارروائی کے دوران پولیس ٹیم پر حملہ کیا گیا۔ پولیس کے مطابق اب تک تقریباً 10 افراد کو اس واقعے کے سلسلے میں حراست میں لیا جا چکا ہے۔ ایف آئی آر نامعلوم افراد کے خلاف درج کی گئی ہے، تاہم ابتدائی جانچ کی بنیاد پر چار سے پانچ مشتبہ افراد کی شناخت کر لی گئی ہے۔ پولیس اہلکاروں کی باڈی کیمرا ریکارڈنگ، سی سی ٹی وی فوٹیج اور زمینی ویڈیوز کی مدد سے پتھراؤ کرنے والوں کی شناخت کی کوششیں جاری ہیں۔

پولیس حکام کا کہنا ہے کہ شناخت کا عمل مکمل ہونے اور خاطر خواہ شواہد اکٹھا ہونے کے بعد مزید قانونی کارروائی کی جائے گی۔ ادھر مقامی ردعمل میں بھی کشیدگی دیکھنے میں آئی۔ ایک مقامی شخص نے بتایا کہ بارات گھر بعد میں بنایا گیا، اس سے پہلے یہاں قبرستان تھا۔ درگاہ کے لوگوں نے قبرستان ہٹا کر برات گھر بنایا۔ یہاں پہلے قبرستان تھا… یہاں برات گھر نہیں بننا چاہیے تھا۔ حکام کے مطابق علاقے کی صورتحال قابو میں ہے اور کسی بھی مزید ناخوشگوار واقعے سے بچنے کے لیے پولیس کی تعیناتی برقرار ہے۔ اس سے قبل بدھ کی علی الصبح ترکمان گیٹ کے قریب ناجائز قبضے والی زمین پر ایم سی ڈی کی انہدامی کارروائی کے دوران پتھراؤ کیا گیا، جس میں چار سے پانچ پولیس اہلکاروں کو معمولی چوٹیں آئیں۔

ڈی سی پی ندھِن والسَن نے کہا کہ کارروائی ابھی جاری ہے۔ ایم سی ڈی انہدام کر رہی ہے اور ہم نے سکیورٹی عملہ تعینات کر رکھا ہے۔ کارروائی رات تقریباً ایک بجے شروع ہوئی۔ ایم سی ڈی نے ہائی کورٹ کے احکامات کے مطابق ناجائز قبضے والی زمین پر انہدام کیا۔ رات میں پولیس پر پتھراؤ ہوا، جس پر ہم نے کم سے کم طاقت استعمال کرتے ہوئے حالات کو قابو میں رکھا۔ مجموعی طور پر عمل بہت ہموار رہا۔ چار سے پانچ اہلکاروں کو معمولی چوٹیں آئیں۔ جیسے ہی ہمیں سی سی ٹی وی، زمینی اور باڈی کیمرا فوٹیج ملے گی، ہم ملزمان کی شناخت کر کے قانونی کارروائی کریں گے۔

مرکزی رینج کے جوائنٹ کمشنر آف پولیس مادھُر ورما نے بتایا کہ انہدامی کارروائی کے دوران چند شرپسندوں نے پتھراؤ کر کے بدامنی پھیلانے کی کوشش کی، تاہم نپی تلی اور کم سے کم طاقت کے استعمال سے صورتحال کو فوری طور پر قابو میں کر لیا گیا اور بغیر کسی بڑے تصادم کے حالات معمول پر آ گئے۔

سٹی ایس پی زون (سی ایس پی زیڈ) کے ڈپٹی کمشنر وویک اگروال نے کہا کہ یہ کارروائی عدالت کے احکامات کے مطابق کی گئی۔ رات کے وقت کارروائی انجام دی گئی۔ یہ ڈھانچہ تقریباً 4,000 مربع میٹر پر پھیلا ہوا تھا اور اسے گرانے کے لیے 32 جے سی بیز استعمال کی گئیں۔ ہم ملبہ صاف کرنے کی بھی کوشش کریں گے۔ پتھراؤ کے دوران کوئی شخص زخمی نہیں ہوا۔ پولیس نے نہایت مؤثر انداز میں حالات کو سنبھالا۔ پولیس حکام کے مطابق علاقے میں صورتحال قابو میں ہے اور انہدامی کارروائی کی تکمیل کے لیے مناسب سکیورٹی انتظامات کیے گئے ہیں۔

دہلی پولیس کے ایک سرکاری بیان کے مطابق، دہلی ہائی کورٹ کی ہدایات پر عمل کرتے ہوئے میونسپل کارپوریشن آف دہلی (ایم سی ڈی) نے 7 جنوری 2025 کی صبح سویرے فیضِ الٰہی مسجد، ترکمان گیٹ، رام لیلا میدان کے قریب ناجائز قبضے والے علاقے میں انہدامی کارروائی انجام دی۔

بیان میں کہا گیا کہ انہدامی پروگرام کو پُرامن طریقے سے انجام دینے اور امن و امان برقرار رکھنے کے لیے دہلی پولیس نے جامع انتظامات کیے تھے۔ پورے علاقے کو نو زونز میں تقسیم کیا گیا تھا، جن میں ہر زون کی نگرانی ایڈیشنل ڈپٹی کمشنر آف پولیس کے رینک کے افسر کے سپرد تھی۔ تمام حساس مقامات پر پولیس کی مناسب نفری تعینات کی گئی تھی۔انہدام سے قبل امن و امان برقرار رکھنے اور کسی بھی ناخوشگوار واقعے سے بچنے کے لیے امن کمیٹی اور مقامی اسٹیک ہولڈرز کے ساتھ متعدد تال میل میٹنگز بھی منعقد کی گئیں اور تمام ممکنہ احتیاطی و اعتماد سازی کے اقدامات کیے گئے۔

تاہم حکام کے مطابق چند “شرپسند عناصر” نے پتھراؤ کر کے حالات خراب کرنے کی کوشش کی، جس پر “نپی تلی اور کم سے کم طاقت” کے استعمال سے فوری قابو پا لیا گیا۔ مرکزی رینج کے جوائنٹ کمشنر آف پولیس مادھُر ورما نے بیان میں کہا کہ انہدامی کارروائی کے دوران چند شرپسندوں نے پتھراؤ کر کے بدامنی پیدا کرنے کی کوشش کی، مگر صورتحال کو فوری طور پر قابو میں کر لیا گیا اور بغیر کسی شدت کے حالات معمول پر بحال ہو گئے۔ دہلی پولیس نے اپنے بیان میں کہا کہ وہ امن و امان برقرار رکھنے کے ساتھ ساتھ تمام عدالتی احکامات کو قانونی، پیشہ ورانہ اور حساس انداز میں نافذ کرنے کے لیے پُرعزم ہے۔

ادھر حکام نے علاقے میں ناجائز تعمیرات کو ہٹانے کے لیے تقریباً 17 بلڈوزر تعینات کیے۔