نئی دہلی: برکس سربراہی اجلاس 2026 سے قبل قومی راجدھانی دہلی کو پوسٹروں اور روشن تنصیبات سے سجایا گیا ہے اور شہر کے اہم حصوں نے اس اعلیٰ سطحی تقریب سے پہلے تہوار جیسی شکل اختیار کرلی ہے۔برکس سربراہان کا اجلاس 12 اور 13 ستمبر کو نئی دہلی کے بھارت منڈپم میں منعقد ہوگا۔ اس سال اجلاس کا سرکاری موضوع ’’لچک جدت تعاون اور پائیداری کے لیے تعمیر‘‘ ہے۔

ابتدا میں برازیل روس ہندوستان اور چین پر مشتمل برک اتحاد قائم کیا گیا تھا۔ اس اتحاد کے وزرائے خارجہ کی پہلی ملاقات 2006 میں نیویارک میں اقوام متحدہ کی جنرل اسمبلی کے موقع پر ہوئی تھی جبکہ 2009 میں روس کے شہر یکاترین برگ میں اس کا پہلا سربراہی اجلاس منعقد ہوا۔ جنوبی افریقہ کی 2011 میں شمولیت کے بعد یہ اتحاد برکس میں تبدیل ہوگیا۔

اس کے بعد اس اتحاد میں نمایاں توسیع ہوئی اور جنوری 2024 میں مصر ایتھوپیا ایران سعودی عرب اور متحدہ عرب امارات کو مکمل رکن کے طور پر شامل کیا گیا۔ اس کے بعد جنوری 2025 میں انڈونیشیا بھی مکمل رکن بن گیا۔ اس وقت برکس میں 11 مکمل رکن ممالک شامل ہیں جبکہ شراکت دار ممالک کی تعداد بھی مسلسل بڑھ رہی ہے۔ اس کے باعث یہ اتحاد عالمی اقتصادی اور سفارتی سطح پر نمایاں اثر و رسوخ رکھتا ہے۔

دریں اثنا دہلی ٹریفک پولیس نے آئندہ برکس سربراہی اجلاس کے پیش نظر تفصیلی ٹریفک انتظامات کو حتمی شکل دے دی ہے۔اس اہم اجلاس میں مختلف ممالک کے سربراہان مملکت غیر ملکی وفود بین الاقوامی تنظیموں کے سربراہان اور اہم شخصیات شرکت کریں گی۔انتظامات کے بارے میں خبر رساں ایجنسی اے این آئی سے گفتگو کرتے ہوئے ایڈیشنل کمشنر پولیس ٹریفک دنیش کمار گپتا نے بتایا کہ غیر ملکی وفود کی آمد و رفت کو ہموار رکھنے اور عوام کو کم سے کم پریشانی سے دوچار کرنے کے لیے قومی راجدھانی میں وسیع پیمانے پر حفاظتی اور آمد و رفت کے انتظامات کیے جا رہے ہیں۔

دنیش کمار گپتا نے کہا کہ برکس سربراہی اجلاس 11 12 اور 13 ستمبر کو دہلی کے بھارت منڈپم میں ہوگا۔ مختلف ممالک کے سربراہان غیر ملکی وفود تنظیموں کے سربراہان اور اہم شخصیات یہاں پہنچیں گی۔ اس لیے ٹریفک کے لیے تفصیلی انتظامات کیے گئے ہیں۔انہوں نے بتایا کہ ٹریفک پولیس اہلکار مقررہ راستوں پر گاڑیوں کے قافلوں کی مشق کر رہے ہیں اور انہیں تمام انتظامات کے بارے میں مکمل معلومات دی جا رہی ہیں۔

انہوں نے کہا کہ غیر ملکی وفود اور اہم شخصیات شہر کے 9 ہوٹلوں میں قیام کریں گی۔ ان ہوٹلوں سے بھارت منڈپم تک آنے والے راستوں کی نشاندہی کرلی گئی ہے۔ ان راستوں پر گاڑیوں کے قافلوں کی مشق کی جا رہی ہے اور عملے کو مناسب ہدایات دی گئی ہیں۔گپتا نے بتایا کہ اہم شخصیات کے قافلوں کی آمد و رفت کے دوران ٹریفک کو منظم کرنے اور لوگوں کو متبادل راستوں کی طرف بھیجنے کے لیے 22 مقامات کی نشاندہی کی گئی ہے۔

دہلی پولیس نے سربراہی اجلاس کے انتظامات کے تحت 35 سے زائد سڑکوں کی بھی نشاندہی کی ہے جہاں ٹریفک کو محدود یا متبادل راستوں کی طرف موڑا جائے گا۔ ان پابندیوں کا زیادہ اثر دہلی کے وسطی اور جنوبی علاقوں اور ان سے ملحقہ علاقوں پر پڑے گا۔ اہم شخصیات کے قافلوں کی آمد و رفت کے دوران کچھ وقت کے لیے ٹریفک کو عارضی طور پر روکے جانے کی بھی توقع ہے۔

یہ ٹریفک انتظامات غیر ملکی رہنماؤں اور وفود کی آمد و رفت کو ہموار رکھنے اور عوام کو کم سے کم پریشانی سے دوچار کرنے کے لیے کیے جا رہے ہیں۔ مسافروں کو مشورہ دیا گیا ہے کہ وہ اپنے سفر کی منصوبہ بندی پہلے سے کریں اور ٹریفک پابندیوں کے دوران متبادل راستوں اور عوامی نقل و حمل خصوصاً دہلی میٹرو کا استعمال کریں۔