نئی دہلی/ آواز دی وائس

کانگریس کے کارکنوں نے پیر کے روز سپریم کورٹ کے باہر احتجاج کیا اور 2017 کے اناؤ عصمت دری کیس کی متاثرہ کے لیے انصاف کا مطالبہ کیا۔ سپریم کورٹ کی تین رکنی ویکیشن بینچ، جس کی سربراہی چیف جسٹس آف انڈیا (سی جے آئی) سوریہ کانت کر رہے ہیں، آج سینٹرل بیورو آف انویسٹی گیشن (سی بی آئی) کی اس عرضی پر سماعت کرے گی جس میں دہلی ہائی کورٹ کے اُس فیصلے کو چیلنج کیا گیا ہے، جس کے تحت 2017 کے اناؤ عصمت دری کیس میں سزا یافتہ کلدیپ سینگر کی عمر قید کی سزا معطل کرنے کی اجازت دی گئی تھی۔

آل انڈیا مہلا کانگریس کی صدر الکا لمبا کی قیادت میں کانگریس کارکنوں نے احتجاج کیا، جس کے دوران پولیس نے کئی مظاہرین کو حراست میں لے لیا۔ خواتین حقوق کی کارکن یوگیتا بھایانا نے صحافیوں سے گفتگو میں کہا کہ متاثرہ کو انصاف ملنے کی پوری امید ہے۔

انہوں نے کہا کہ متاثرہ کو امید ہے کہ اسے انصاف ملے گا۔ اس کی صحت کی حالت مستحکم ہے اور اس وقت وہ خود عدالت کے اندر موجود ہے کیونکہ وہ اپنی لڑائی خود لڑنا چاہتی ہے۔ مجھے یقین ہے کہ سپریم کورٹ اس لڑکی کو انصاف دے گی۔ دہلی ہائی کورٹ کے 23 دسمبر کے حکم کے تحت سابق بی جے پی ایم ایل اے سینگر کی عمر قید کی سزا اپیل زیرِ سماعت رہنے تک معطل کر دی گئی تھی اور انہیں ضمانت بھی دی گئی تھی۔

کلدیپ سینگر کو دسمبر 2019 میں اناؤ عصمت دری کیس میں مجرم قرار دیا گیا تھا اور ان پر 25 لاکھ روپے جرمانے کے ساتھ عمر قید کی سزا سنائی گئی تھی۔ اگرچہ اس کیس میں انہیں ضمانت مل گئی ہے، تاہم وہ جیل میں ہی رہیں گے کیونکہ وہ قتل سے متعلق ایک دوسرے سی بی آئی کیس میں 10 سال کی سزا کاٹ رہے ہیں۔ اس سے قبل اتوار کو متاثرہ نے کہا تھا کہ اسے پورا یقین ہے کہ سپریم کورٹ سے اسے انصاف ملے گا۔ اس نے اتر پردیش کے وزیر اعلیٰ یوگی آدتیہ ناتھ سے اپیل کی کہ اس کی حفاظت کو یقینی بنایا جائے تاکہ وہ بلا خوف اپنی قانونی لڑائی لڑ سکے۔

قومی دارالحکومت میں آل انڈیا پروگریسیو ویمن ایسوسی ایشن (اے آئی پی ڈبلیو اے) کے زیرِ اہتمام احتجاج کے دوران اناؤ عصمت دری کیس کی متاثرہ نے الزام لگایا کہ سینگر نے سی بی آئی کے تفتیشی افسر اور دہلی ہائی کورٹ کے ایک جج سمیت متعدد اہلکاروں کو رشوت دی، اور کہا کہ ضمانت کے بعد اس کے خاندان کو شدید نتائج کا سامنا کرنا پڑا ہے۔ انہوں نے  کہا کہ مجھے یقین ہے کہ سپریم کورٹ سے مجھے انصاف ملے گا۔ کلدیپ سینگر نے دہلی ہائی کورٹ کے جج اور سی بی آئی کے ایک تفتیشی افسر کو رشوت دی ہے۔ میرے شوہر کی نوکری چھین لی گئی، اور میرے بچوں اور گواہوں کو دھمکیاں دی جا رہی ہیں۔ جن افراد کے نام ہم سی بی آئی کے سامنے لیتے ہیں، انہیں تحفظ فراہم کیا جانا چاہیے۔ میں وزیر اعلیٰ یوگی آدتیہ ناتھ سے درخواست کرتی ہوں کہ مجھے اس طرح تحفظ دیا جائے کہ میں بے خوف ہو کر اپنی لڑائی لڑ سکوں۔