نئی دہلی

دہلی حکومت نے وزیر اعلیٰ ریکھا گپتا کی قیادت میں دوارکا واقع اندرا گاندھی اسپتال کے کیمپس میں ایک جدید میڈیکل کالج اور ہاسٹل کمپلیکس کی تعمیر کی منظوری دے دی ہے۔ وزیر اعلیٰ کے دفتر کی جانب سے جاری بیان کے مطابق، اس منصوبے پر 805.99 کروڑ روپے لاگت آئے گی اور اسے سال 2028 تک مکمل کرنے کا ہدف رکھا گیا ہے۔

دہلی میں صحت اور طبی تعلیم کے بنیادی ڈھانچے کو مضبوط بنانے کی سمت میں یہ ایک بڑا قدم مانا جا رہا ہے۔ اس منصوبے کو حال ہی میں اخراجاتی مالیاتی کمیٹی کے اجلاس میں منظوری دی گئی، جس کی صدارت وزیر اعلیٰ ریکھا گپتا نے کی۔

وزیر اعلیٰ کے مطابق، اس منصوبے میں مکمل میڈیکل کالج، طلبہ و طالبات کے لیے علیحدہ ہاسٹل، فیکلٹی رہائش گاہیں اور ایک جدید تعلیمی بلاک شامل ہوگا۔ اس اقدام سے دارالحکومت میں ڈاکٹروں کی بڑھتی ہوئی ضرورت کو پورا کرنے اور صحت خدمات کو مزید مضبوط بنانے میں مدد ملے گی۔بیان میں کہا گیا کہ یہ میڈیکل کالج نیشنل میڈیکل کمیشن کے ضوابط کے مطابق تیار کیا جائے گا، اور مستقبل میں یہاں ہر سال 250 ایم بی بی ایس نشستیں دستیاب ہوں گی۔ تدریسی سرگرمیوں کا آغاز ابتدائی طور پر 150 طلبہ کے پہلے بیچ سے کیا جائے گا۔

ریکھا گپتا نے کہا کہ اس منصوبے کو مرحلہ وار مکمل کیا جائے گا۔ پہلے مرحلے میں تعلیمی بلاک، طلبہ ہاسٹل اور فیکلٹی کے رہائشی کوارٹرز کی تعمیر پر توجہ دی جائے گی۔ اس مرحلے میں تقریباً 1,17,246 مربع میٹر رقبہ تیار کیا جائے گا، جس میں قریب 34,000 مربع میٹر تہہ خانہ پارکنگ اور دیگر ضروری سہولیات کے لیے مختص ہوگا۔تعلیمی بلاک ایک کثیر منزلہ عمارت ہوگی، جس میں جدید کلاس رومز، لیبارٹریاں اور جدید تدریسی سہولیات فراہم کی جائیں گی۔ ہاسٹل بڑی تعداد میں طلبہ کی رہائش کے لیے تیار کیے جائیں گے، جبکہ فیکلٹی رہائش گاہوں میں آرام دہ اور جدید سہولیات میسر ہوں گی۔

تعمیراتی کام پبلک ورکس ڈپارٹمنٹ انجام دے گا، جبکہ صحت و خاندانی بہبود محکمہ اس منصوبے کی نگرانی کرے گا۔وزیر اعلیٰ نے کہا کہ منصوبے میں جدید اور پائیدار تعمیراتی تکنیک اپنائی جائے گی۔ عمارتیں زلزلہ مزاحم اور توانائی کے مؤثر استعمال کے مطابق تیار کی جائیں گی۔ گرین بلڈنگ منصوبے کے تحت کیمپس میں شمسی توانائی کے نظام، بارش کے پانی کو محفوظ کرنے، پانی کی ری سائیکلنگ، قدرتی روشنی اور مناسب ہواداری کا انتظام ہوگا۔

پورا کیمپس معذور افراد کے لیے بھی مکمل طور پر قابلِ رسائی بنایا جائے گا، جہاں ریمپ، لفٹ، بریل سائن بورڈ اور وہیل چیئر کے موافق راستے موجود ہوں گے۔ اس کے علاوہ سی سی ٹی وی نگرانی، فائر الارم اور آگ سے تحفظ کے جدید نظام بھی نصب کیے جائیں گے۔ریکھا گپتا نے افسران کو ہدایت دی کہ معیار اور مقررہ مدت پر سختی سے عمل کیا جائے۔ انہوں نے کہا کہ مضبوط نگرانی کا نظام قائم کیا جائے گا تاکہ منصوبہ وقت پر مکمل ہو سکے، اور غیر ضروری تاخیر یا اضافی اخراجات ہرگز برداشت نہیں کیے جائیں گے۔انہوں نے مزید کہا کہ طبی آلات کی خریداری، عملے کی بھرتی، یونیورسٹی سے الحاق اور دیگر انتظامی تقاضے بعد کے مراحل میں نیشنل میڈیکل کمیشن کے اصولوں کے مطابق مکمل کیے جائیں گے۔

وزیر اعلیٰ نے اس منصوبے کو دہلی کے طبی مستقبل میں ایک طویل مدتی سرمایہ کاری قرار دیتے ہوئے کہا کہ یہ صرف ایک اور میڈیکل کالج کی تعمیر نہیں بلکہ پورے شہر کے صحت نظام کو مضبوط بنانے کی کوشش ہے۔ انہوں نے کہا کہ حکومت کا مقصد دارالحکومت کے ہر شہری کو بہتر اور آسان طبی سہولتیں فراہم کرنا ہے، اور اس کے لیے تربیت یافتہ ڈاکٹروں کی تعداد میں اضافہ نہایت ضروری ہے۔

انہوں نے یقین ظاہر کیا کہ ادارہ فعال ہونے کے بعد نہ صرف دہلی بلکہ آس پاس کے علاقوں سے علاج کے لیے آنے والے افراد کو بھی فائدہ پہنچائے گا۔ ریکھا گپتا نے معیاری طبی تعلیم کے لیے حکومت کے عزم کا اعادہ کرتے ہوئے کہا کہ یہ نیا ادارہ مستقبل کے ماہر ڈاکٹروں کی تیاری میں اہم کردار ادا کرے گا۔