نئی دہلی
دہلی کی وزیر اعلیٰ ریکھا گپتا نے مالویہ نگر میں پیش آنے والے افسوسناک آتشزدگی کے واقعے کے دوران غیر معمولی بہادری کا مظاہرہ کرنے والے روہت مکھیا کے خاندان کے لیے فوری طور پر 5 لاکھ روپے کی مالی امداد کا اعلان کیا ہے۔
وزیر اعلیٰ کے دفتر کے مطابق، روہت مکھیا نے آگ لگنے کے واقعے کے دوران اپنی جان کو خطرے میں ڈال کر کئی افراد کی جان بچائی، جس پر انہیں ان کے فرض شناسی اور انسان دوستی کے جذبے کے لیے بھرپور سراہا جا رہا ہے۔
وزیر اعلیٰ نے کہا کہ مالویہ نگر کے المناک آتشزدگی کے واقعے میں روہت مکھیا جی نے غیر معمولی جرات اور انسانیت کا مظاہرہ کرتے ہوئے متعدد افراد کی جانیں بچائیں اور فرض شناسی و ہمدردی کی ایک متاثر کن مثال قائم کی۔ان کی بہادری کو سراہتے ہوئے ریکھا گپتا نے اعلان کیا کہ دہلی حکومت روہت کے خاندان کو فوری طور پر 5 لاکھ روپے کی مالی امداد فراہم کرے گی۔ انہوں نے یہ بھی یقین دہانی کرائی کہ روہت کی مکمل صحت یابی تک ان کے علاج کے تمام اخراجات حکومت برداشت کرے گی۔
وزیر اعلیٰ نے کہا کہ روہت کی مکمل صحت یابی تک ان کے علاج کے تمام اخراجات دہلی حکومت برداشت کرے گی۔ اس مشکل وقت میں دہلی حکومت پوری حساسیت اور عزم کے ساتھ ان اور ان کے خاندان کے شانہ بشانہ کھڑی ہےیہ اعلان ایسے وقت میں کیا گیا ہے جب روہت مکھیا آگ کے دوران لوگوں کو بچاتے ہوئے زخمی ہونے کے بعد زیرِ علاج ہیں۔
دہلی حکومت نے کہا کہ وہ روہت اور ان کے خاندان کو ہر ممکن مدد فراہم کرنے کے لیے پُرعزم ہے اور ان کے اقدام کو معاشرے کے لیے ایک تحریک اور مشکل حالات میں جرات و بہادری کی روشن مثال قرار دیا۔
دریں اثنا، دہلی کی وزیر اعلیٰ ریکھا گپتا نے جمعہ کو مالویہ نگر کے حوض رانی علاقے میں لگنے والی ہولناک آگ اور ساکیت کے سیدالاجاب علاقے میں عمارت گرنے کے المناک حادثے میں جان گنوانے والوں کو خراجِ عقیدت پیش کیا۔اس موقع پر دہلی سیکریٹریٹ میں ایک خصوصی اور پُرسکون تقریب کا انعقاد کیا گیا، جہاں وزیر اعلیٰ نے ان بہادر شہریوں، پولیس اہلکاروں، انتظامی افسران اور امدادی کارکنوں کو بھی اعزاز سے نوازا جنہوں نے دوسروں کی جان بچانے کے لیے اپنی جانوں کو خطرے میں ڈالا تھا۔
ان افراد کو ان کی خدمات کے اعتراف میں تعریفی اسناد اور 21 ہزار روپے کے چیک پیش کیے گئے۔ تقریب میں مالویہ نگر کے رکن اسمبلی ستیش اپادھیائے اور چھترپور کے رکن اسمبلی کرتار سنگھ تنور بطور معزز مہمان شریک ہوئے۔پروگرام کے دوران وزیر اعلیٰ نے خاص طور پر ریاض الدین منصوری کو اعزاز سے نوازا، جنہوں نے حوض رانی میں آتشزدگی کے دوران غیر معمولی جرات اور حاضر دماغی کا مظاہرہ کرتے ہوئے نیچے گدے بچھائے، جس کے باعث کئی افراد کی جانیں بچ سکیں۔
ان کے انسان دوست اقدام کو سراہتے ہوئے وزیر اعلیٰ نے ان کے استعمال کردہ گدوں کی لاگت واپس کرنے کی ہدایت دی اور حوصلہ افزائی کے طور پر انہیں 21 ہزار روپے کا چیک بھی پیش کیا۔تقریب کے اختتام پر دونوں سانحات میں جان گنوانے والوں کی یاد میں دو منٹ کی خاموشی اختیار کی گئی۔
