نئی دہلی: ہفتہ کی صبح دہلی کی فضائی کیفیت میں شدید بگاڑ دیکھنے میں آیا۔ مرکزی آلودگی کنٹرول بورڈ کے جاری کردہ اعداد و شمار کے مطابق صبح تقریباً 8 بجے مجموعی ایئر کوالٹی انڈیکس 393 ریکارڈ کیا گیا جو بہت خراب زمرے میں آتا ہے۔

یہ صورتحال جمعہ کو بھی خراب فضائی حالات کے تسلسل کا نتیجہ ہے۔ سرکاری اعداد و شمار کے مطابق 12 دسمبر کو شام تقریباً 4 بجے ایئر کوالٹی انڈیکس 349 درج کیا گیا تھا۔ قومی دارالحکومت کے کئی علاقے زہریلی اسموگ کی گھنی تہہ میں لپٹے رہے جس کے باعث حد نگاہ متاثر ہوئی اور شہریوں کو شدید پریشانی کا سامنا کرنا پڑا۔

اس کے نتیجے میں دارالحکومت کے کئی مقامات کو شدید زمرے میں رکھا گیا۔ سی پی سی بی کے مطابق آنند وہار میں ایئر کوالٹی انڈیکس 436 ریکارڈ کیا گیا جہاں زہریلی دھند کی موٹی چادر چھائی رہی۔ اسی طرح اشوک وہار میں 435 آئی ٹی او میں 425 ڈی ٹی یو میں 426 اور نہرو نگر میں 427 ایئر کوالٹی انڈیکس درج کیا گیا جو شدید خرابی کی علامت ہے۔

تاہم شہر کے مختلف حصوں میں فضائی کیفیت میں فرق بھی دیکھا گیا جہاں کئی علاقوں میں ایئر کوالٹی انڈیکس بہت خراب کے زمرے میں رہا۔ سی پی سی بی کے مطابق نجف گڑھ میں ایئر کوالٹی انڈیکس 312 جبکہ شادے پور میں 375 ریکارڈ کیا گیا۔ اوکھلا فیز 2 اور دوارکا سیکٹر 8 میں بالترتیب 400 اور 394 ایئر کوالٹی انڈیکس درج کیا گیا جو دیگر علاقوں کے مقابلے میں قدرے بہتر مگر مجموعی طور پر تشویشناک صورتحال کو ظاہر کرتا ہے۔

ایئر کوالٹی انڈیکس کی درجہ بندی کے مطابق 0 سے 50 تک اچھا 51 سے 100 تک تسلی بخش 101 سے 200 تک معتدل 201 سے 300 تک خراب 301 سے 400 تک بہت خراب اور 401 سے 500 تک شدید تصور کیا جاتا ہے۔

ادھر دہلی کی وزیر اعلیٰ ریکھا گپتا نے جمعہ کو کہا کہ ان کی حکومت دارالحکومت میں آلودگی پر مؤثر اور پائیدار قابو پانے کے لیے کئی محاذوں پر کام کر رہی ہے۔ انہوں نے کہا کہ گرد و غبار کی آلودگی کا خاتمہ حکومت کی اولین ترجیحات میں شامل ہے اور اسی مقصد کے تحت دہلی بھر میں وال ٹو وال سڑکیں تیز رفتاری سے تعمیر کی جا رہی ہیں۔

وزیر اعلیٰ کے دفتر کے مطابق ریکھا گپتا نے بتایا کہ سڑکوں کی تعمیر میں کسی رکاوٹ سے بچنے کے لیے ارکان اسمبلی کو کروڑوں روپے کے خاطر خواہ فنڈز فراہم کیے گئے ہیں۔ انہوں نے زور دے کر کہا کہ آلودگی پر قابو صرف حکومتی کوششوں سے ممکن نہیں بلکہ عوامی شراکت بھی نہایت ضروری ہے۔ شہریوں کو گرد و غبار اور دھویں میں کمی لانے میں اپنے کردار کو سمجھنا ہوگا اور اس کے مطابق عمل کرنا ہوگا۔

ریکھا گپتا نے مزید کہا کہ اڑتی ہوئی دھول دہلی میں آلودگی کی ایک بڑی وجہ ہے اس لیے سڑکوں کے کناروں پر طویل مدتی دھول کنٹرول کے لیے وال ٹو وال سڑکیں ایک مؤثر حل ہیں۔ انہوں نے ارکان اسمبلی کو ہدایت دی کہ تمام نئی تعمیرات اور مرمتی کام وال ٹو وال سڑک ماڈل کے مطابق کیے جائیں۔ انہوں نے یہ بھی واضح کیا کہ اگر اس کام کے لیے اضافی فنڈز درکار ہوں تو وہ فوری طور پر فراہم کیے جائیں گے۔