نئی دہلی: پیر کی شام لال قلعے کے باہر ہوئے زوردار دھماکے میں کم از کم آٹھ افراد ہلاک اور متعدد زخمی ہو گئے۔ ذرائع کے مطابق دہلی پولیس کو سی سی ٹی وی فوٹیج ملی ہے جس میں مشتبہ کار کو پارکنگ ایریا میں داخل ہوتے اور نکلتے ہوئے دیکھا جا سکتا ہے۔

پولیس ذرائع نے بتایا کہ فوٹیج سے ظاہر ہوتا ہے کہ اس وقت کار میں صرف ایک شخص موجود تھا۔ذرائع نے مزید بتایا، ’’تحقیقات کرنے والی ٹیم اب دریہ گنج کی سمت میں مشتبہ کار کے راستے کا سراغ لگا رہی ہے، جبکہ 100 سے زائد سی سی ٹی وی ویڈیوز، جن میں قریبی ٹول پلازہ کی فوٹیج بھی شامل ہے، گاڑی کی مکمل نقل و حرکت معلوم کرنے کے لیے دیکھی جا رہی ہیں۔‘‘

اسی دوران دہلی پولیس نے اس دھماکے کے سلسلے میں غیر قانونی سرگرمیاں (روک تھام) قانون (یو اے پی اے)، ایکسپلوسیو ایکٹ اور بھارتیہ نیائے سنہیتا (بی این ایس) کی مختلف دفعات کے تحت مقدمہ درج کر لیا ہے۔

پولیس کے مطابق، ’’کوٹوالی پولیس اسٹیشن میں یو اے پی اے کی دفعات 16 اور 18، ایکسپلوسیو ایکٹ اور بی این ایس کی مختلف دفعات کے تحت مقدمہ درج کیا گیا ہے۔‘‘

اس سے قبل مرکزی وزیر داخلہ امیت شاہ نے بتایا کہ پیر کی شام تقریباً 7 بجے دہلی کے لال قلعے کے قریب سوبھاش مارگ ٹریفک سگنل پر ایک ہنڈائی آئی 20 کار میں دھماکہ ہوا، جس سے کچھ راہگیر زخمی ہوئے اور کچھ گاڑیوں کو نقصان پہنچا۔

انہوں نے کہا، ’’ابتدائی اطلاعات کے مطابق کچھ لوگوں کی جان گئی ہے۔ اطلاع ملنے کے 10 منٹ کے اندر دہلی کرائم برانچ اور اسپیشل برانچ کی ٹیمیں جائے وقوعہ پر پہنچ گئیں۔‘‘

امیت شاہ نے مزید بتایا، ’’میں نے دہلی پولیس کمشنر اور اسپیشل برانچ کے انچارج سے بات کی ہے۔ دونوں افسران جائے وقوعہ پر موجود ہیں۔ ہم ہر ممکن پہلو پر غور کر رہے ہیں اور جامع تفتیش کی جا رہی ہے۔ تمام امکانات کی چھان بین کے بعد نتائج عوام کے سامنے پیش کیے جائیں گے۔‘‘

دہلی پولیس کمشنر ستیش گولچا نے پہلے بتایا تھا کہ قومی دارالحکومت میں لال قلعہ میٹرو اسٹیشن کے قریب ایک سست رفتار گاڑی لال بتی پر رکی تھی، اسی دوران اس میں دھماکہ ہوا جس سے آس پاس کھڑی گاڑیوں کو بھی نقصان پہنچا۔

انہوں نے کہا، ’’آج تقریباً 6 بج کر 52 منٹ پر ایک سست رفتار گاڑی لال بتی پر رکی، اسی دوران گاڑی میں دھماکہ ہوا۔ دھماکے سے قریبی گاڑیوں کو بھی نقصان پہنچا۔ تمام ایجنسیاں — ایف ایس ایل، این آئی اے — موقع پر موجود ہیں۔ کچھ لوگ جاں بحق ہوئے اور کچھ زخمی ہیں۔ صورتحال پر پوری طرح نظر رکھی جا رہی ہے۔‘‘