نئی دہلی
مودی حکومت کے 12 سال مکمل ہونے کے موقع پر بدھ کے روز دہلی بی جے پی کے رہنماؤں اور کارکنوں نے پورے شہر میں "سوچھتا ابھیان" (صفائی مہم) میں حصہ لیا۔دہلی بی جے پی کے صدر ہرش ملہوترا کی قیادت میں پارٹی کے ارکانِ پارلیمنٹ، اراکینِ اسمبلی، ریاستی عہدیداران اور دہلی حکومت کے وزراء نے دارالحکومت کے 256 بلاکس میں منعقدہ اس مہم میں شرکت کی۔
ہرش ملہوترا نے مقامی بی جے پی رکن اسمبلی ابھے ورما کے ساتھ لکشمی نگر میٹرو اسٹیشن کے قریب مہم کا آغاز کیا اور کہا کہ ہر شہری کو کچرا نہ پھیلانے کا عہد کرنا چاہیے۔انہوں نے میونسپل کارپوریشن آف دہلی کے صفائی کارکنوں کی بھی تعریف کی اور کہا کہ وہ شہر کی سڑکوں، گلیوں اور محلّوں کو صاف ستھرا رکھنے میں اہم کردار ادا کر رہے ہیں۔
دہلی بی جے پی کے جنرل سیکریٹری (تنظیم) پون رانا نے پارٹی رہنماؤں وشنو متل اور سنیل یادو کے ساتھ کناٹ پلیس میں واقع قدیم ہنومان مندر میں صفائی مہم میں حصہ لیا۔اس دوران دہلی جل بورڈ کے نائب چیئرمین ستیش اپادھیائے اور رکن اسمبلی کرتار سنگھ تنور نے چھترپور میں واقع کاتیاینی دیوی مندر اور دھرم شالہ کے فرش اور ریلنگز کی صفائی کی۔
