ایودھیا 

بابری مسجد-رام جنم بھومی مقدمے کے سابق فریق اقبال انصاری نے جمعرات کو مسلم برادری سے گایوں کا احترام کرنے کی اپیل کرتے ہوئے تجویز دی کہ مرکزی حکومت گائے کو قومی جانور کا درجہ دے۔اے این آئی سے گفتگو کرتے ہوئے انصاری نے ہندوستان میں گائے کی ثقافتی اور مذہبی اہمیت پر زور دیا اور کہا کہ اکثریتی برادری کے جذبات کا احترام کیا جانا چاہیے۔

انہوں نے کہا کہ ہم ہندوستانی مسلمان ہیں اور گائے کو 'گاؤ ماتا' کہا جاتا ہے، اس لیے مسلمانوں کو گایوں کا احترام کرنا چاہیے۔ حکومت کو اسے قومی جانور قرار دینا چاہیے۔انہوں نے گائے کے ذبح (گاؤ ہتیا) پر مکمل پابندی کی بھرپور حمایت کرتے ہوئے کہا کہ بعض عناصر اکثر ایسے معاملات کو فرقہ وارانہ نفرت پھیلانے اور مسلم برادری کو بدنام کرنے کے لیے استعمال کرتے ہیں۔

انصاری نے مزید کہا کہ گائے کی قربانی بالکل نہیں ہونی چاہیے۔ ہندو مذہب میں اس کی پوجا کی جاتی ہے۔ لوگوں کو گائے کا احترام کرنا چاہیے۔ اگر ہندو اس کا احترام کرتے ہیں تو گائے کی قربانی کی کسی بھی صورت اجازت نہیں ہونی چاہیے۔اس مسئلے کے مذہبی اور صحت سے متعلق پہلوؤں پر روشنی ڈالتے ہوئے سابق فریق نے کہا کہ اسلامی روایات گائے کے گوشت کے استعمال کی حوصلہ افزائی نہیں کرتیں، جبکہ گائے سے حاصل ہونے والی اشیاء کی طبی اہمیت بھی مسلمہ ہے۔

انہوں نے کہا کہ گائے کا دودھ فائدہ مند اور دواؤں جیسی خصوصیات کا حامل ہے۔ گائے کا گوشت کھانا ممنوع ہے۔ ہمارا مذہب اسلام پہلے ہی اس سے منع کرتا ہے۔ تاہم کچھ لوگ مسلمانوں کو بدنام کرنے کے لیے ایسے کام کرتے ہیں۔ انہیں گایوں کا احترام کرنا چاہیے اور انہیں عزت دینی چاہیے۔یہ اپیل کولکتہ کی نکھودہ مسجد کے امام مولانا محمد شفیق قاسمی کی جانب سے کی گئی اسی نوعیت کی اپیل کے ایک دن بعد سامنے آئی ہے۔

مولانا قاسمی نے مسلمانوں سے سماجی ہم آہنگی برقرار رکھنے اور ہندو برادری کے مذہبی جذبات کا احترام کرنے کے لیے گائے کی قربانی سے گریز کرنے اور گائے کا گوشت کھانے سے اجتناب کرنے کی اپیل کی تھی۔ انہوں نے گائے کو "قومی جانور" قرار دینے کے مطالبے کی بھی حمایت کی تھی۔دریں اثنا، مغربی بنگال میں مذہبی مقامات پر لاؤڈ اسپیکروں کے استعمال سے متعلق جاری تنازع پر بات کرتے ہوئے مولانا قاسمی نے اتوار کو کہا کہ نہ سپریم کورٹ اور نہ ہی آلودگی کنٹرول بورڈ کی جانب سے مائیکروفون یا لاؤڈ اسپیکر ہٹانے کا کوئی حکم جاری کیا گیا ہے۔

ان کا یہ بیان مغربی بنگال میں اپوزیشن کے سینئر رہنماسویندو ادھیکاری  کی جانب سے مبینہ طور پر ضلع اور پولیس حکام کے ساتھ ایک اعلیٰ سطحی اجلاس میں دی گئی ہدایات کے بعد سامنے آیا، جن میں مذہبی مقامات پر لاؤڈ اسپیکروں کی آواز کو قابو میں رکھنے اور مذہبی سرگرمیوں کے باعث سڑکوں پر ٹریفک جام نہ ہونے دینے کی بات کہی گئی تھی۔مولانا قاسمی نے مایوسی کا اظہار کرتے ہوئے کہا کہ پولیس افسران مائیکروفون ہٹانے کا مطالبہ کر رہے ہیں، حالانکہ سپریم کورٹ یا آلودگی کنٹرول بورڈ کی جانب سے ایسا کوئی حکم موجود نہیں ہے۔

انہوں نے کہا کہ یہ ضابطہ بی جے پی حکومت نے نہیں بلکہ آلودگی کنٹرول بورڈ نے بنایا تھا۔ قانون کے مطابق مائیکروفون ہٹانے کا کوئی حکم نہیں تھا، نہ آلودگی کنٹرول بورڈ کی طرف سے اور نہ ہی سپریم کورٹ کی طرف سے۔ بلکہ صنعتی علاقوں میں 75 سے 80 ڈیسی بل، تجارتی علاقوں میں 70 سے 75 ڈیسی بل اور رہائشی علاقوں میں 65 سے 70 ڈیسی بل تک مائیکروفون استعمال کرنے کی اجازت دی گئی تھی۔ جبکہ سائلنس زون میں آواز کی حد 40 سے 45 ڈیسی بل مقرر کی گئی تھی۔ لیکن پولیس مائیکروفون ہٹانے کو کہہ رہی ہے، جو درست نہیں ہے۔ انہیں قانون کے مطابق کام کرنا چاہیے اور ہم بھی قانون کے مطابق ہی عمل کریں گے۔