نئی دہلی: دہلی کی ایک عدالت نے 2020 کے دہلی فسادات سے متعلق مبینہ بڑی سازش کے مقدمے میں سماجی کارکن عمر خالد اور شرجیل امام کی ضمانت کی درخواستوں پر فیصلہ محفوظ کر لیا ہے۔ ایڈیشنل سیشن جج سمیر باجپئی نے فریقین کے دلائل سننے کے بعد فیصلہ محفوظ کیا۔ امکان ہے کہ عدالت شام تک اپنا حکم جاری کرے گی۔

عمر خالد اور شرجیل امام نے اپنی درخواستوں میں مؤقف اختیار کیا کہ مقدمے کی سماعت شروع نہ ہونے کے باوجود طویل عرصے سے جیل میں رہنا ان کے بنیادی حقِ آزادی کی خلاف ورزی ہے۔ عمر خالد نے اپنی درخواست میں کہا کہ اگرچہ سپریم کورٹ پہلے ان کی ضمانت کی درخواست مسترد کر چکی ہے، لیکن بعد میں عدالتی فیصلوں کی وجہ سے حالات میں تبدیلی آئی ہے۔

انہوں نے مئی میں سپریم کورٹ کے ایک فیصلے کا حوالہ دیا، جس میں کہا گیا تھا کہ ضمانت اصول ہے، قید استثنا، حتیٰ کہ غیر قانونی سرگرمیوں کی روک تھام کے قانون (یو اے پی اے) کے تحت بھی۔ دونوں نے نئی ضمانت کی درخواستیں اس وقت دائر کیں جب سپریم کورٹ نے 5 جنوری کو یو اے پی اے کے تحت ان کی ضمانت مسترد کر دی تھی۔

شرجیل امام نے اپنی درخواست میں کہا کہ سپریم کورٹ کے فیصلے کے چھ ماہ بعد بھی مقدمے میں کوئی نمایاں پیش رفت نہیں ہوئی، جبکہ وہ تقریباً چھ برس سے بغیر مقدمہ چلائے جیل میں ہیں۔ درخواست میں کہا گیا کہ اتنے طویل عرصے کے باوجود اب تک دونوں کے خلاف الزامات بھی طے نہیں کیے گئے۔

عمر خالد نے بھی مؤقف اختیار کیا کہ وہ تقریباً چھ برس سے جیل میں ہیں اور مقدمے کی کارروائی شروع ہونے کے آثار بھی نظر نہیں آتے، کیونکہ اس کیس میں ملزمان، گواہوں اور دستاویزات کی تعداد بہت زیادہ ہے۔ انہوں نے سپریم کورٹ کے متعدد فیصلوں، جن میں یونین آف انڈیا بنام کے اے نجیب اور ورنن گونزالویس بنام ریاست مہاراشٹر شامل ہیں، کا حوالہ دیتے ہوئے کہا کہ اگر مقدمہ مناسب مدت میں مکمل ہونے کا امکان نہ ہو تو یو اے پی اے کی سخت شرائط بھی آئینی حقوق پر غالب نہیں آ سکتیں۔ 5 جنوری کو سپریم کورٹ نے اسی مقدمے میں عمر خالد اور شرجیل امام کی ضمانت مسترد کرتے ہوئے شریک ملزمان گلفشا فاطمہ، میران حیدر، شفا الرحمٰن، محمد سلیم خان اور شاداب احمد کو ضمانت دی تھی۔

سپریم کورٹ نے اس وقت کہا تھا کہ عمر خالد اور شرجیل امام کے خلاف بادی النظر میں یو اے پی اے کے تحت مقدمہ بنتا ہے اور تمام ملزمان کو ایک ہی معیار پر نہیں پرکھا جا سکتا، کیونکہ مبینہ کردار اور شرکت کی نوعیت مختلف ہے۔ عمر خالد، شرجیل امام اور دیگر کئی افراد پر الزام ہے کہ وہ فروری 2020 میں شمال مشرقی دہلی میں ہونے والے فسادات کی مبینہ بڑی سازش کا حصہ تھے، جس کے تحت ان پر یو اے پی اے اور تعزیراتِ ہند (آئی پی سی) کی مختلف دفعات کے تحت مقدمہ درج کیا گیا ہے۔