نئی دہلی: وزیرِ اعظم نریندر مودی نے پیر کے روز سنٹرل ریزرو پولیس فورس (سی آر پی ایف) کے یومِ تاسیس پر اہلکاروں کو مبارکباد پیش کرتے ہوئے کہا کہ اندرونی سلامتی کو یقینی بنانے سے لے کر مشکل حالات میں عوام کی خدمت تک، سی آر پی ایف کے جوانوں نے ہمیشہ قوم کو اولین ترجیح دی ہے۔

وزیرِ اعظم نے کہا کہ ماؤ نوازی کے خاتمے میں سی آر پی ایف کے اہلکاروں کی خدمات خاص طور پر قابلِ ذکر ہیں، جنہوں نے متعدد علاقوں میں امن و امان کے قیام اور ترقی کی راہ ہموار کرنے میں اہم کردار ادا کیا ہے۔ مودی نے سوشل میڈیا پلیٹ فارم ایکس پر اپنی پوسٹ میں کہا، "سی آر پی ایف کے تمام اہلکاروں کو یومِ تاسیس کی مبارکباد۔

سی آر پی ایف نے اپنی بے مثال بہادری اور فرض شناسی سے منفرد شناخت قائم کی ہے۔ اندرونی سلامتی کے تحفظ سے لے کر مشکل حالات میں شہریوں کی خدمت تک، سی آر پی ایف کے اہلکاروں نے ہمیشہ قوم کو سب سے پہلے رکھا ہے۔" سی آر پی ایف ملک کی سب سے بڑی مرکزی پولیس فورس ہے، جسے اندرونی سلامتی برقرار رکھنے کی ذمہ داری سونپی گئی ہے۔

اس فورس کا قیام 27 جولائی 1939 کو کراؤن ریپریزینٹیٹو پولیس کے نام سے عمل میں آیا تھا۔ بعد ازاں 28 دسمبر 1949 کو سی آر پی ایف ایکٹ نافذ ہونے کے بعد اس کا نام تبدیل کر کے سنٹرل ریزرو پولیس فورس (CRPF) رکھ دیا گیا۔