کولکتہ
مغربی بنگال کے وزیر اعلیٰ سوویندو ادھیکاری نے ہفتہ کے روز سرکاری ایس ایس کے ایم اسپتال میں 100 بستروں پر مشتمل نئے وارڈ کا آن لائن افتتاح کیا اور صحت کے شعبے سے متعلق کئی اہم اقدامات کا اعلان کیا۔ ان میں ویکسینیشن مہم کی توسیع، نیشنل ہیلتھ مشن کا نفاذ اور ریاست کے 1.36 کروڑ سے زائد خاندانوں کو آیوشمان بھارت اسکیم کے تحت شامل کرنا شامل ہے۔
تقریب سے خطاب کرتے ہوئے انہوں نے کہا کہ ریاستی حکومت نیشنل ہیلتھ مشن کو نافذ کرے گی اور آیوشمان بھارت اسکیم کے ذریعے صحت کی سہولیات کا دائرہ وسیع کیا جائے گا۔
انہوں نے کہا کہ ہم نیشنل ہیلتھ مشن نافذ کرنے جا رہے ہیں۔ ہم 1 کروڑ 36 لاکھ خاندانوں کو آیوشمان بھارت کے دائرے میں لا رہے ہیں۔ مزید ڈاکٹرز، نرسیں اور تکنیکی و غیر تکنیکی عملہ بھرتی کیا جائے گا۔
سوویندو ادھیکاری نے کہا کہ ریاستی حکومت نے مختصر مدت میں بڑے پیمانے پر ویکسینیشن مہم کامیابی سے مکمل کی ہے۔
انہوں نے بتایا کہ آج ہم نے 235 اسپتالوں، صحت مراکز، بلاک اسپتالوں اور دیہی اسپتالوں میں یہ ویکسینیشن مہم شروع کی۔ مرکزی وزارتِ صحت نے ہمیں 7 لاکھ 72 ہزار 750 ویکسین خوراکیں فراہم کی تھیں اور ہم نے صرف تین ہفتوں میں یہ مہم مکمل کر لی۔
صحت کے بنیادی ڈھانچے کو مضبوط بنانے پر زور
وزیر اعلیٰ نے کہا کہ ایس ایس کے ایم اسپتال میں نئے 100 بستروں والے وارڈ کے قیام سے مریضوں کے بڑھتے دباؤ کو کم کرنے اور ریفرل سے متعلق مسائل کے حل میں مدد ملے گی۔
انہوں نے کہا کہ ایس ایس کے ایم اسپتال میں 100 بستروں پر مشتمل ایک نیا وارڈ شروع کیا گیا ہے۔ اسپتالوں میں ریفرل کے مسائل سے نمٹنے کے لیے ہم نے ایک خصوصی ٹیم بھی تشکیل دی ہے۔
غریب مریضوں کے لیے نجی اسپتالوں میں بستر محفوظ
سوویندو ادھیکاری نے معاشی طور پر کمزور طبقات کے لیے سستی علاج کی سہولت یقینی بنانے کے اقدامات کا بھی اعلان کیا۔
انہوں نے کہا کہ جن نجی اسپتالوں نے حکومت سے ایک روپے کی علامتی قیمت پر زمین حاصل کی ہے، انہیں ہدایت دی گئی ہے کہ وہ اپنے 15 فیصد بستر غریب مریضوں کے لیے مختص کریں۔
اسپتالوں کو نئی شناخت دی جائے گی
وزیر اعلیٰ نے کہا کہ ریاست بھر کے صحت مراکز اور اسپتالوں کو ایک نئی شناخت دی جائے گی۔
انہوں نے اعلان کیا کہ ہمارے اسپتالوں کا نام اب 'آیوشمان مندر' ہوگا۔
شمالی بنگال میں ایمس طرز کے ادارے کا منصوبہ
سوویندو ادھیکاری نے یہ بھی بتایا کہ حکومت شمالی بنگال میں ایمس (آل انڈیا انسٹی ٹیوٹ آف میڈیکل سائنسز) طرز کے ایک جدید طبی ادارے کے قیام کے لیے زمین کی نشاندہی کرنے پر کام کر رہی ہے۔
