نئی دہلی
سپریم کورٹ نے پیر کے روز اس درخواست پر سماعت سے انکار کر دیا جس میں الزام لگایا گیا تھا کہ پنجاب کے وزیر اعلیٰ بھگونت مان نے یہ بیان دیا ہے کہ اعلیٰ ترین عدالت نے آوارہ کتوں کو مارنے کی ’’کھلی چھوٹ‘‘ دے دی ہے۔جسٹس وکرم ناتھ اور جسٹس سندیپ مہتا پر مشتمل بنچ نے اس معاملے میں سماعت کی درخواست کرنے والے وکیل سے کہا کہ کیا صرف وزیر اعلیٰ کے ایک بیان کی بنیاد پر ہمیں اپنا حکم تبدیل کرنا ہوگا؟
وکیل نے عدالت کو بتایا کہ آوارہ کتوں سے متعلق سپریم کورٹ کے 19 مئی کے حکم کے بعد پنجاب کے وزیر اعلیٰ نے مبینہ طور پر ایکس پر پوسٹ کرتے ہوئے کہا تھا کہ سپریم کورٹ نے آوارہ کتوں کو مارنے کی کھلی چھوٹ دے دی ہے۔
اس پر بنچ نے کہا کہ آپ پنجاب ہائی کورٹ سے رجوع کریں۔ ہم آپ کی درخواست قبول نہیں کر رہے ہیں۔وکیل نے یہ بھی دعویٰ کیا کہ سپریم کورٹ کے حکم کے بعد سے آوارہ کتوں کو مارا جا رہا ہے۔
سپریم کورٹ نے 19 مئی کو اپنے ایک اہم فیصلے میں انسانی جانوں کو لاحق خطرات کم کرنے کے لیے ریبیز سے متاثرہ، بیمار، خطرناک اور جارحانہ کتوں کو ہلاک کرنے کی اجازت دی تھی۔عدالت نے کہا تھا کہ اس فیصلے کا مقصد انسانی زندگی کے تحفظ کو یقینی بنانا ہے، کیونکہ باوقار زندگی گزارنے کے حق میں یہ بھی شامل ہے کہ لوگ کتوں کے حملوں یا نقصان کے خوف کے بغیر آزادانہ طور پر نقل و حرکت کر سکیں۔
اپنی نوعیت کے اس پہلے حکم میں سپریم کورٹ نے قرار دیا تھا کہ جب انسانی جان اور اس کی سلامتی کا موازنہ حساس جانداروں کے مفادات اور فلاح و بہبود سے کیا جائے تو آئینی توازن واضح طور پر انسانی زندگی کے تحفظ اور سلامتی کے حق میں جھکنا چاہیے۔
