نئی دہلی

 پٹیالہ ہاؤس کورٹ کی ڈیوٹی مجسٹریٹ نے آدھی رات کو اپنی رہائش گاہ پر ہونے والی سماعت کے بعد اُدے بھانو چِب کو ضمانت منظور کر لی۔ چِب کو پولیس تحویل کے چار دن مکمل ہونے کے بعد رات تقریباً 12:30 بجے جج کے سامنے پیش کیا گیا۔ انہیں اے آئی سمٹ احتجاج کیس میں گرفتار کیا گیا تھا۔

ڈیوٹی مجسٹریٹ ونشیکا مہتا نے 50 ہزار روپے کے مچلکے پر، دیگر شرائط کے ساتھ، اُدے بھانو چِب کی ضمانت منظور کی۔پولیس نے چِب کے پولیس ریمانڈ میں سات دن کی توسیع کی درخواست کی تھی، تاہم عدالت نے تحویل میں توسیع سے انکار کر دیا۔اُدے بھانو چِب کی جانب سے ایڈووکیٹ محمد سلیمان، ایڈووکیٹ روپیش سنگھ بھدوریہ اور چِتوان گوڈارا عدالت میں پیش ہوئے۔

ایڈووکیٹ سلیمان محمد خان نے بتایا كہ دہلی پولیس کرائم برانچ نے یوتھ کانگریس کے قومی صدر اُدے بھانو چِب کے پولیس ریمانڈ میں توسیع کے لیے درخواست دی تھی۔ انہوں نے سات دن کی توسیع مانگی، اس کے علاوہ دو مزید درخواستیں بھی دائر کیں—ایک ملزم کے لیے پانچ دن اور دوسرے کے لیے دو دن کے ریمانڈ کی۔

انہوں نے مزید کہا كہ ملزمان کے وکیل کی جانب سے قومی صدر اُدے بھانو چِب کو ضمانت دینے کی درخواست بھی دائر کی گئی تھی۔ایڈووکیٹ سلیمان محمد کے مطابق، “ملزمان کے وکیل اور دہلی پولیس کے دلائل سننے کے بعد ڈیوٹی مجسٹریٹ نے اُدے بھانو چِب کو ضمانت دے دی۔ ضمانتی حکم میں واضح کیا گیا کہ پولیس کرائم برانچ پولیس تحویل میں توسیع کی مناسب وجوہات پیش کرنے میں ناکام رہی۔ چند شرائط عائد کی گئی ہیں، جن میں پاسپورٹ اور الیکٹرانک آلات عدالت میں جمع کرانا اور 50 ہزار روپے کی ایک ضمانت پیش کرنا شامل ہے۔

ایڈووکیٹ روپیش سنگھ بھدوریہ نے اے این آئی کو بتایا کہ یہ اُدے بھانو چِب کی نئی گرفتاری نہیں تھی؛ وہ پہلے ہی چار دن پولیس تحویل میں رہ چکے تھے۔ “ہمیں رات 12 بجے پیغام ملا کہ انہیں صبح تقریباً 6 بجے ڈیوٹی مجسٹریٹ کے سامنے پیش کیا جائے گا۔انہوں نے کہا كہ خوش قسمتی سے ہمیں کم از کم ان کے بارے میں اطلاع ملی، کیونکہ دیگر کے بارے میں کوئی پیغام نہیں آیا تھا۔ پھر رات 12:30 بجے فون آیا کہ انہیں 1 بجے پیش کیا جائے گا۔ ہم گھبراہٹ میں پہنچے۔ سماعت رات 1:30 بجے شروع ہوئی۔

۔24 فروری کو، اُدے بھانو چِب کے چار دن کے پولیس ریمانڈ کی منظوری دیتے ہوئے پٹیالہ ہاؤس کورٹ نے ریکارڈ کیا تھا کہ دہلی پولیس کی کیس ڈائری کے مطابق چِب موقع واردات پر جسمانی طور پر موجود نہیں تھے۔ الزام ہے کہ انہوں نے احتجاج کی ہدایات دیں اور احتجاج کے دوران دیگر ملزمان سے رابطے میں تھے۔جوڈیشل مجسٹریٹ فرسٹ کلاس (جے ایم ایف سی) روی نے یہ بھی نوٹ کیا کہ بادی النظر میں گرفتاری میمو اور گرفتاری کی وجوہات سے ظاہر ہوتا ہے کہ دہلی پولیس نے چِب کے کردار کو “پردے کے پیچھے سے کارروائی کرنے” کے طور پر منسوب کیا ہے۔

ریمانڈ کے حکم میں عدالت نے یہ بھی کہا کہ محض یہ کہنا کہ خودمختاری متاثر ہوئی ہے، طویل پولیس تحویل کو جائز قرار نہیں دیتا، اور یہ کہ سات دن کی تحویل بہت زیادہ ہے جبکہ چار دن کافی ہیں۔عدالت نے حکم میں کہا كہ تحقیقی ادارے کو تحویل کی ضرورت کی معقول وضاحت پیش کرنا ہوگی۔

دہلی پولیس نے اُدے بھانو چِب کو 24 فروری کی صبح گرفتار کیا تھا۔