سمستی پور/ آواز دی وائس

اتر پردیش کے وزیر اعلیٰ یوگی آدتیہ ناتھ نے منگل کے روز کانگریس کے رہنما راہل گاندھی پر تنقید کرتے ہوئے کہا کہ جس طرح کانگریس نے بھگوان رام اور رام مندر پر سوال اٹھائے تھے، اسی طرح اس کا ’یوراج‘ اب چھٹھ مئیّا پر سوال اٹھا رہا ہے۔ سمستی پور میں ایک انتخابی ریلی سے خطاب کرتے ہوئے وزیر اعلیٰ یوگی نے کہا کہ ...وزیر اعظم نریندر مودی کی قیادت میں بہار میں ترقی ہو رہی ہے، لیکن آر جے ڈی اور کانگریس کے ایجنڈے میں بہار کی ترقی شامل نہیں ہے۔ جس طرح کانگریس نے بھگوان رام اور رام مندر پر سوال اٹھائے تھے، اسی طرح کانگریس کا یوراج اب چھٹھ مئیّا پر سوال اٹھا رہا ہے۔

یہ بیان اس وقت آیا جب لوک سبھا میں قائدِ حزبِ اختلاف راہل گاندھی نے دربھنگہ میں کہا کہ بی جے پی نے ’’ڈرامہ‘‘ رچایا اور وزیر اعظم مودی کے لیے چھٹھ پوجا کے موقع پر نہانے کے لیے ایک الگ تالاب بنوایا۔ راہل گاندھی نے کہا کہ وزیر اعظم مودی نے کہا تھا کہ وہ چھٹھ کے موقع پر جمنا میں نہائیں گے۔ جمنا کا پانی گندا ہے، اگر کوئی اسے پی لے تو بیمار پڑ جائے یا مر جائے۔ کوئی اس میں جا ہی نہیں سکتا۔ پانی اتنا گندا ہے کہ اگر آپ اندر جائیں تو انفیکشن ہو جائے۔ لیکن مودی نے ڈرامہ کیا۔ وہاں ایک چھوٹا تالاب بنوایا گیا، اور انتخابات کے لیے کچھ بھی دکھایا جا سکتا ہے۔ پیچھے سے ایک پائپ لگایا گیا، جس سے صاف پانی بھرا گیا۔ مسئلہ یہ ہوا کہ کسی نے اس پائپ کی تصویر کھینچ لی۔

ادھر بہار میں انتخابات میں اصل مقابلہ قومی جنتانترک اتحاد (این ڈی اے) اور مہاگٹھ بندھن کے درمیان ہے۔ این ڈی اے میں بھارتیہ جنتا پارٹی (بی جے پی)، جنتا دل (یونائیٹڈ)، لوک جن شکتی پارٹی (رام ولاس)، ہندوستانی عوام مورچہ (سیکولر) اور راشٹریہ لوک مورچہ شامل ہیں۔

جبکہ مہاگٹھ بندھن، جس کی قیادت راشٹریہ جنتا دل (آر جے ڈی) کر رہی ہے، میں کانگریس، کمیونسٹ پارٹی آف انڈیا (مارکسی-لیننسٹ)  جس کی قیادت دیپانکر بھٹاچاریہ کر رہے ہیں — کمیونسٹ پارٹی آف انڈیا (سی پی آئی)، کمیونسٹ پارٹی آف انڈیا (مارکسی) (سی پی ایم) اور مکیش سہنی کی وکاسییل انسان پارٹی (وی آئی پی) شامل ہیں۔

اس کے علاوہ پرشانت کشور کی ’’جن سوراج‘‘ پارٹی نے ریاست کی تمام 243 نشستوں پر انتخاب لڑنے کا اعلان کیا ہے۔اسمبلی انتخابات دو مرحلوں میں 6 اور 11 نومبر کو ہوں گے، جبکہ نتائج 14 نومبر کو جاری کیے جائیں گے۔