گوہاٹی
آسام کانگریس کے صدر گورو گوگوئی نے ہفتہ کے روز بی جے پی اور الیکشن کمیشن پر سخت حملہ کرتے ہوئے اسٹرونگ رومز کی نگرانی میں بے ضابطگیوں کا الزام لگایا اور دعویٰ کیا کہ برسرِ اقتدار جماعت اپنے کام کی بنیاد پر انتخابات نہیں جیت سکتی، اس لیے وہ "چوری کے ذریعے خود کو بچانے" کی کوشش کر رہی ہے۔گوگوئی نے الزام لگایا کہ بھارتیہ جنتا پارٹی کے کارکنوں کو اسٹرونگ رومز کے اندر جانے کی اجازت دی جا رہی ہے اور وہ ووٹنگ کے دوران بھی وہاں موجود تھے۔
انہوں نے اے این آئی سے بات کرتے ہوئے کہا کہ یہاں آسام میں ہم مختلف پولنگ بوتھوں پر دیکھ رہے ہیں کہ بی جے پی کارکن نہ صرف اسٹرونگ رومز کے اندر موجود ہیں بلکہ ووٹنگ کے دوران بھی وہاں موجود تھے۔ سب سے اہم سوال یہ ہے کہ الیکشن کمیشن کیا کر رہا ہے؟ یہ جمہوریت کے لیے ایک بڑا خطرہ ہے۔
انہوں نے اس صورتحال کو "بہت خطرناک" قرار دیتے ہوئے کہا کہ ہم اپوزیشن پارٹیاں بار بار یہ مسئلہ اٹھا رہی ہیں۔ یہ واضح ہے کہ بی جے پی اپنے کام کی بنیاد پر انتخابات نہیں جیت سکتی، اس لیے وہ چوری کے ذریعے خود کو بچانا چاہتی ہے۔مغربی بنگال کی وزیر اعلیٰ ممتا بنرجی کی جانب سے اٹھائے گئے خدشات کا حوالہ دیتے ہوئے گوگوئی نے کہا کہ اسٹرونگ رومز کی حفاظت پر تعینات عملے کے بارے میں بھی سوالات اٹھائے گئے ہیں۔آسام کے وزیر اعلیٰ ہمانتا بسوا سرما کو نشانہ بناتے ہوئے انہوں نے مبینہ غیر ملکی دوروں پر سوال اٹھائے اور کہا کہ میں چاہتا ہوں کہ ہمانتا بسوا سرما ہمیں بتائیں کہ ان کے خاندان نے کتنی بار دبئی کا دورہ کیا اور وہ خود کتنی بار بنگلہ دیش گئے ہیں۔ عام لوگوں کو جو سکیورٹی پولیس کو فراہم کرنی چاہیے، وہ نہیں دی جا رہی، بلکہ وزیر اعلیٰ کی ہدایات پر صرف اپوزیشن لیڈروں کے خلاف کارروائی کی جا رہی ہے۔
انہوں نے مزید کہا کہ آسام میں بے روزگاری، مہنگائی اور ایل پی جی کی بڑھتی قیمتیں بڑے مسائل ہیں۔یہاں منشیات کا بہت بڑا مسئلہ ہے، لیکن پولیس انتظامیہ عام لوگوں کی حفاظت کے بجائے وزیر اعلیٰ کے حکم پر صرف اپوزیشن رہنماؤں کے خلاف کارروائی میں مصروف ہے۔ایگزٹ پولز پر ردعمل دیتے ہوئے گوگوئی نے ان کی ساکھ کو مسترد کرتے ہوئے انہیں "ٹی آر پی پر مبنی مشق" قرار دیا۔
انہوں نے کہا کہ یہ اب صرف ٹی آر پی کا کھیل بن گیا ہے۔ ہمارے ریاست کے لوگ خوف کے ماحول میں نہ تو ایگزٹ پولز کو اور نہ ہی صحافیوں کو پوری بات بتاتے ہیں، اسی لیے اس پورے نظام کو کہیں نہ کہیں درست کرنے کی ضرورت ہے۔
سیاسی تبدیلیوں پر اعتماد ظاہر کرتے ہوئے انہوں نے کہا کہ لوگ بی جے پی سے دور ہو رہے ہیں۔ وہ ہمیں فون کر کے کہہ رہے ہیں کہ وہ ہمانتا بسوا سرما کے ساتھ کام نہیں کرنا چاہتے۔ تبدیلی پہلے ہی شروع ہو چکی ہے اور بی جے پی کے اتحادی بھی کانگریس کی طرف آ رہے ہیں۔"
کانگریس رہنما پون کھیڑا کو سپریم کورٹ سے پیشگی ضمانت ملنے پر بات کرتے ہوئے گوگوئی نے کہا کہ یہ انتہائی افسوسناک ہے کہ ایک خوبصورت اور مہذب ریاست آسام کے وزیر اعلیٰ کے بارے میں سپریم کورٹ میں توہین آمیز الفاظ استعمال کیے گئے، جو تمام حدود سے باہر ہے۔ یہ ہمارے لیے شرم کی بات ہے کہ ہمارے ریاست کے وزیر اعلیٰ بار بار عدالت میں نامناسب زبان استعمال کرتے ہیں، جس سے ریاست کی شبیہ خراب ہوتی ہے اور ہمارے وقار کو ٹھیس پہنچتی ہے۔"
