نئی دہلی

مہاراشٹر کے وزیر اعلیٰ دیویندر فڈنویس نے جمعہ کو الزام عائد کیا کہ کانگریس ایک ’’ڈوبتا ہوا جہاز‘‘ ہے اور انہیں نہیں لگتا کہ کوئی بھی اپوزیشن جماعت اس پر سوار ہونا چاہے گی۔فڈنویس نے یہ تبصرہ اس سوال کے جواب میں کیا جس میں ترنمول کانگریس اور نیشنلسٹ کانگریس پارٹی (شرد پوار دھڑا) کے کانگریس میں انضمام کے امکانات کے بارے میں پوچھا گیا تھا۔

انہوں نے نئی دہلی میں صحافیوں سے گفتگو کرتے ہوئے کہا کہ اپوزیشن کے متحد ہونے سے بھارتیہ جنتا پارٹی (بی جے پی) کے لیے سیاسی طور پر مزید مواقع پیدا ہوں گے۔وزیر اعلیٰ نے کہا کہ کانگریس ایک ڈوبتا ہوا جہاز ہے اور کوئی بھی شخص ڈوبتے ہوئے جہاز پر قدم نہیں رکھتا۔ لیکن اگر کوئی ایسا کرتا بھی ہے تو اس سے ہمارا کوئی نقصان نہیں ہوگا۔

فڈنویس نے کہا کہ بی جے پی نے اس معاملے پر ’’دیکھو اور انتظار کرو‘‘ کی پالیسی اختیار کی ہے۔ انہوں نے کہا کہ اگر اپوزیشن جماعتیں اس ‘ڈوبتے ہوئے جہاز’ کانگریس میں شامل بھی ہو جاتی ہیں تو ہمارے لیے سیاسی طور پر مزید گنجائش پیدا ہوگی۔بدھ کے روز سنجے راؤت نے مشورہ دیا تھا کہ ترنمول کانگریس اور نیشنلسٹ کانگریس پارٹی (شرد پوار دھڑا) جیسی جماعتیں، جو اپنے رہنماؤں کے کانگریس سے الگ ہونے کے بعد قائم ہوئی تھیں، انہیں دوبارہ کانگریس میں شامل ہو جانا چاہیے تاکہ بی جے پی کے مقابلے میں ایک مضبوط متبادل تیار کیا جا سکے۔

راؤت نے جمعرات کو کہا تھا کہ شرد پوار کو چھوٹی جماعتوں کے کانگریس میں انضمام کے لیے پہل کرنی چاہیے۔