کانگریس، سی پی آئی اور سماجوادی پارٹی بھگوان رام مخالف ہیں: کرن رجیجو

نئی دہلی: مرکزی وزیر برائے پارلیمانی امور کرن رجیجو نے بدھ کے روز کانگریس، کمیونسٹ پارٹی آف انڈیا (سی پی آئی) اور سماجوادی پارٹی (ایس پی) پر "بھگوان رام مخالف" رویہ اختیار کرنے کا الزام لگاتے ہوئے کہا کہ ان جماعتوں نے ہمیشہ بھگوان رام کے وجود کی مخالفت کی اور رام مندر کی تعمیر کے خلاف احتجاج کیا۔

لوک سبھا میں خطاب کرتے ہوئے رجیجو نے ایودھیا رام مندر میں مبینہ چندہ چوری کے معاملے پر اپوزیشن کے احتجاج کو تنقید کا نشانہ بنایا۔ انہوں نے کہا کہ جب رام مندر تعمیر ہو رہا تھا تو اپوزیشن نے اس کی مخالفت میں بازوؤں پر سیاہ پٹیاں باندھی تھیں۔ رجیجو نے کہا، "کانگریس، سی پی آئی اور سماجوادی پارٹی بھگوان رام مخالف ہیں۔

انہوں نے ہمیشہ بھگوان رام کے خلاف موقف اختیار کیا ہے اور ان کے وجود تک کی مخالفت کی ہے۔ جب رام مندر تعمیر کیا جا رہا تھا تو انہوں نے سیاہ پٹیاں باندھ کر احتجاج کیا۔ لیکن پارلیمنٹ کے احاطے میں جو ڈرامہ انہوں نے کیا ہے، اس سے ہمیں شدید افسوس ہوا ہے۔" مرکزی وزیر نے اپوزیشن جماعتوں سے عوامی معافی کا مطالبہ کرتے ہوئے کہا کہ انہیں ملک سے اور بھگوان رام کی توہین پر معافی مانگنی چاہیے۔

انہوں نے کہا، "میں چاہتا ہوں کہ کانگریس، سماجوادی پارٹی اور سی پی آئی ملک سے معافی مانگیں اور بھگوان رام کی توہین پر بھی معذرت کریں۔" رجیجو کے یہ بیانات ایسے وقت میں سامنے آئے ہیں جب اپوزیشن نے لوک سبھا میں اپنا احتجاج جاری رکھا، جس کے باعث ایوان کی کارروائی بار بار ملتوی ہوتی رہی۔

اس سے قبل بدھ کو پارلیمنٹ ہاؤس میں حکومت اور اپوزیشن کے رہنماؤں کے درمیان حلقہ بندی (ڈیلیمیٹیشن) بل پر تبادلۂ خیال کے لیے قائدِ حزبِ اختلاف راہل گاندھی کے کمرے میں تقریباً 50 منٹ تک ملاقات ہوئی۔ کانگریس ذرائع کے مطابق اس ملاقات میں کرن رجیجو نے ڈیلیمیٹیشن بل پر اپوزیشن کا موقف جاننے کی کوشش کی۔ بدھ کی صبح راہل گاندھی، پرینکا گاندھی واڈرا اور دیگر اپوزیشن ارکان نے پارلیمنٹ کے احاطے میں گاندھی مجسمے سے مکر دروازہ تک مارچ کیا۔ انہوں نے 20 جولائی کو سی جے پی مظاہرین کے خلاف مبینہ پولیس کارروائی، ایودھیا رام مندر میں مبینہ چندہ خردبرد اور دیگر مسائل پر مرکزی وزیر داخلہ امت شاہ کے خلاف احتجاج کیا۔