لکھنؤ: اتر پردیش کے وزیر اعلیٰ یوگی آدتیہ ناتھ نے جمعہ کے روز معروف ہندوستانی نشانہ باز اور شوٹنگ کوچ جسپال رانا کے انتقال پر گہرے رنج و غم کا اظہار کرتے ہوئے کہا کہ عالمی سطح پر ہندوستان کا نام روشن کرنے والی ان کی غیر معمولی کامیابیاں اور نوجوان کھلاڑیوں کی رہنمائی میں ان کی خدمات ہمیشہ یاد رکھی جائیں گی۔

۔ 49 سالہ جسپال رانا جمعرات کی شب دہلی کے ایک اسپتال میں انتقال کر گئے۔ یوگی آدتیہ ناتھ نے سوشل میڈیا پلیٹ فارم ’’ایکس‘‘ پر اپنے تعزیتی پیغام میں کہا: ’’عالمی شہرت یافتہ ہندوستانی نشانہ باز، شوٹنگ کوچ اور ’پدم شری‘ اعزاز یافتہ جسپال رانا جی کا انتقال نہایت افسوسناک واقعہ اور ہندوستانی کھیلوں کی دنیا کے لیے ناقابلِ تلافی نقصان ہے۔

میری جانب سے انہیں خراجِ عقیدت۔‘‘ انہوں نے مزید کہا: ’’عالمی سطح پر ہندوستان کو عزت و وقار دلانے والی ان کی غیر معمولی کامیابیاں اور نوجوان کھلاڑیوں کی تربیت و رہنمائی کے لیے ان کی خدمات ہمیشہ یاد رکھی جائیں گی۔‘‘