ویلنگٹن/ آواز دی وائس

ہندوستان کے وزیرِ تجارت و صنعت پیوش گوئل نے جمعہ کے روز نیوزی لینڈ کے اپنے سرکاری دورے کا اختتام کرتے ہوئے کہا کہ دونوں ممالک ایک "متوازن، جامع اور باہمی طور پر فائدہ مند" آزاد تجارتی معاہدے  کو جلد از جلد مکمل کرنے کی سمت میں کام کر رہے ہیں۔

پیوش گوئل نے اپنے سوشل میڈیا پلیٹ فارم ایکس پر ایک پوسٹ میں بتایا کہ اس دورے کے دوران انہوں نے اور ان کے وفد نے ہندوستان-نیوزی لینڈ ایف ٹی اے مذاکرات کے چوتھے مرحلے میں ہونے والی پیش رفت کا جائزہ لیا، جس میں اشیائے تجارت، خدمات، معاشی و تکنیکی تعاون اور سرمایہ کاری کے مواقع پر توجہ دی گئی۔ وزیرِ تجارت نے اس بات پر زور دیا کہ ہندوستان کا مقصد ایک ایسا معاہدہ طے کرنا ہے جو دونوں ممالک کے درمیان بڑھتی ہوئی اسٹریٹجک اور معاشی قربت کی عکاسی کرے۔

انہوں نے لکھا کہ میں نے نیوزی لینڈ کے اپنے نتیجہ خیز دورے کا اختتام اپنے دوست اور ہم منصب ٹڈ میک کلی سے ملاقات کے ساتھ کیا۔ ہندوستان-نیوزی لینڈ ایف ٹی اے کے چوتھے مرحلے میں اشیاء کی تجارت، خدمات، اقتصادی و تکنیکی تعاون اور سرمایہ کاری کے مواقع پر توجہ مرکوز رہی۔ ہم ایک متوازن، جامع اور باہمی طور پر فائدہ مند معاہدے کے جلد اختتام کی سمت میں کام کرنے کے منتظر ہیں۔

وزارتِ تجارت و صنعت کے جاری کردہ بیان کے مطابق، 3 تا 7 نومبر کے دورے کے دوران پیوش گوئل نے آکلینڈ اور روٹوروا میں کاروباری شخصیات، صنعت کے نمائندوں اور ہندوستانی کمیونٹی کے اراکین سے وسیع پیمانے پر ملاقاتیں کیں۔ آکلینڈ چیمبر آف کامرس اور ہندوستان کے ہائی کمیشن کی شراکت سے منعقدہ ہندوستان-نیوزی لینڈ بزنس فورم اس دورے کا ایک اہم حصہ رہا۔ اس فورم نے دونوں ملکوں کے سرکاری عہدیداروں اور صنعت کے اہم اسٹیک ہولڈرز کو ایک پلیٹ فارم پر اکٹھا کیا تاکہ نئی شراکت داریوں اور تعاون کے امکانات تلاش کیے جا سکیں۔

بیان کے مطابق، فورم میں پیوش گوئل اور ٹڈ میک کلی کے درمیان ہونے والی گفتگو نے اس امر کو اجاگر کیا کہ دونوں ممالک میں سیاسی اور معاشی سطح پر تعلقات کو گہرا کرنے کی مضبوط خواہش موجود ہے۔ یہ بات مارچ 2025 میں وزیرِ اعظم نریندر مودی اور نیوزی لینڈ کے وزیرِ اعظم کرسٹوفر لَکسن کی ہندوستان میں ہونے والی ملاقات کے بعد پیدا ہونے والی نئی رفتار پر مبنی تھی، جہاں دونوں رہنماؤں نے مستقبل بَر انداز تجارتی معاہدے پر کام کرنے پر اتفاق کیا تھا۔

گوئل نے نیوزی لینڈ کی کئی معروف کاروباری شخصیات سے بھی ملاقات کی، جن میں کارمین وائسیلچ (سی ای او، ویلاسٹی)، رنجے سِکّا (سی ای او، سلمبر زون)، نتھن گائے (چیئرمین، میٹ انڈسٹری ایسوسی ایشن)، اور ٹونی کلفرڈ (منیجنگ ڈائریکٹر، پین پیک) شامل تھے۔ ان ملاقاتوں میں زراعت، سیاحت، ٹیکنالوجی، تعلیم، کھیل، گیمنگ، ڈرون ٹیکنالوجی، اور خلائی تحقیق میں تعاون بڑھانے پر تبادلہ خیال ہوا، جس میں خلائی اشتراک کو ایک ابھرتا ہوا نیا موقع قرار دیا گیا۔

روٹوروا میں وزیر نے ایک سی ای او راؤنڈ ٹیبل سے خطاب کیا، جس میں ہندوستانی کاروباری وفد اور نیوزی لینڈ کے صنعت کار شریک ہوئے۔ انہوں نے ہندوستان کو ایک عالمی سرمایہ کاری کے مرکز کے طور پر پیش کیا، جو اختراع اور ویلیو ایڈیشن کے بے پناہ مواقع فراہم کرتا ہے۔ گوئل اور ٹڈ میک کلی نے آکلینڈ اور روٹوروا میں ہندوستانی نژاد برادری کے اراکین سے بھی ملاقات کی۔

آکلینڈ میں وزیرِ اعظم کرسٹوفر لَکسن نے اس موقع پر شرکت کرتے ہوئے ہندوستانی برادری کو دونوں ممالک کے درمیان ایک "زندہ پل" قرار دیا۔ بیان کے مطابق، گوئل نے کمیونٹی کے اراکین سے کہا کہ وہ نیوزی لینڈ — اپنی "کرَم بھومی" — کی ترقی میں حصہ لیتے رہیں،

اور ساتھ ہی اپنے ہندوستانی ورثے اور جڑوں سے گہرا تعلق برقرار رکھیں، تاکہ دونوں ممالک کی کمیونٹیز کو مضبوط کرنے میں قیادت کا کردار ادا کریں۔ دورے کے دوران ہندوستانی کاروباری وفد نے نیوزی لینڈ کی اہم کمپنیوں سے ملاقاتیں کیں اور ریڈ اسٹاگ سا مل، فونٹیرا گروپ کے ڈیری و فوڈ انوویشن ہیڈکوارٹرز اور آکلینڈ یونیورسٹی انوویشن ہب کے دورے کیے،

جہاں تجارت، ٹیکنالوجی اور سرمایہ کاری میں اشتراک کے مواقع پر بات چیت ہوئی۔ یہ دورہ اس حقیقت کو اجاگر کرتا ہے کہ نیوزی لینڈ، ہندوستان کی ترقی کے سفر میں ایک ابھرتا ہوا اسٹریٹجک شراکت دار بن رہا ہے، اور ہندوستان اس تعلق کو مزید مضبوط اور طویل المدتی اقتصادی تعاون میں تبدیل کرنے کے لیے پُرعزم ہے۔