نئی دہلی
چین کے وزیرِ خارجہ وانگ یی اور ان کے نیپالی ہم منصب ششیِر کھنال نے منگل کے روز بیجنگ میں دونوں ممالک کے دوطرفہ تعلقات کے تمام پہلوؤں پر جامع بات چیت کی۔ششیِر کھنال، ایک ہفتہ طویل دورۂ ہندوستان مکمل کرنے کے بعد 14 جون کو چار روزہ دورے پر بیجنگ پہنچے تھے۔
وانگ یی سے ملاقات کے بعد کھنال نے سوشل میڈیا پلیٹ فارم ایکس پر ایک پوسٹ میں کہا کہ ہم نے رابطہ کاری، سرحدی انتظام، تجارت، ٹیکنالوجی کی منتقلی اور کثیرالجہتی تعاون سمیت دوطرفہ تعلقات کے تمام پہلوؤں پر تفصیلی تبادلۂ خیال کیا۔
انہوں نے مزید کہا کہ ہم نے دونوں ممالک کے عوام کے درمیان روابط کو مزید وسعت دینے کے امکانات پر بھی خیالات کا تبادلہ کیا اور باہمی مفاد کے لیے نیپال-چین تعلقات کو مزید مضبوط بنانے کے اپنے مشترکہ عزم کا اعادہ کیا۔
چینی وزارتِ خارجہ کی جانب سے پیر کو جاری کردہ ایک بیان کے مطابق، وانگ یی نے کھنال سے کہا کہ چین اپنی ہمسایہ پالیسی میں ہمیشہ نیپال کے ساتھ تعلقات کو خصوصی اہمیت دیتا رہا ہے اور تمام نیپالی عوام کے ساتھ دوستانہ رویہ اختیار کرتا ہے۔
انہوں نے کہا کہ چین ہمیشہ کی طرح نیپال کی قومی خودمختاری، آزادی اور علاقائی سالمیت کے تحفظ میں اس کی حمایت کرتا رہے گا اور اس بات کی بھی تائید کرے گا کہ نیپال اپنی قومی ضروریات اور حالات کے مطابق ترقی کا راستہ اختیار کرے۔
