نئی دہلی: انڈین انسٹی ٹیوٹ آف ٹیکنالوجی (آئی آئی ٹی) دہلی نے 31 سالہ ایم ایس سی فزکس کے طالب علم رشیکیش کمار کی موت کے حالات کی تحقیقات کے لیے پانچ رکنی بیرونی انکوائری کمیٹی تشکیل دی ہے۔ آئی آئی ٹی دہلی کے ذرائع نے یہ جانکاری اے این آئی کو دی۔

یہ پیش رفت ایک روز بعد سامنے آئی ہے، جب سیکڑوں طلبہ نے آئی آئی ٹی دہلی کیمپس میں جمع ہو کر دھرنا دیا اور رشیکیش کمار کی موت کی تحقیقات کا مطالبہ کرتے ہوئے طلبہ کے لیے موجود امدادی نظام پر تشویش ظاہر کی۔ کمیٹی میں اتراکھنڈ کے سابق ڈائریکٹر جنرل آف پولیس اشوک کمار شامل ہیں، جو آئی آئی ٹی دہلی کے سابق طالب علم بھی ہیں اور اس وقت اسپورٹس یونیورسٹی ہریانہ کے وائس چانسلر ہیں۔ اس کے علاوہ ایمس نئی دہلی کے شعبۂ نفسیات کے سربراہ پروفیسر پرتاپ شرما، دو طلبہ نمائندے اور آئی آئی ٹی دہلی کے رجسٹرار شامل ہیں، جو کمیٹی کے سیکریٹری اور کنوینر ہوں گے۔

آئی آئی ٹی دہلی کے ڈائریکٹر رنگن بنرجی کی جانب سے منگل کی صبح طلبہ کو بھیجی گئی ای میل کے مطابق، کمیٹی متعلقہ طلبہ اور اساتذہ سے بات کرے گی، متعلقہ انتظامی دفاتر کے کام کاج کا جائزہ لے گی، موجودہ ضابطوں اور طریقہ کار کا معائنہ کرے گی اور اپنی سفارشات پیش کرے گی۔ ادارے نے کمیٹی کو دو ہفتوں کے اندر اپنی رپورٹ پیش کرنے کی ہدایت دی ہے۔

بنرجی نے ای میل میں کہا، "ہم اپنے ایم ایس سی فزکس کے طالب علم رشیکیش کمار کے بے وقت انتقال پر گہرے رنج و غم کا اظہار کرتے ہیں۔" ادارے کے مطابق بیرونی کمیٹی تشکیل دینے کا فیصلہ بڑی تعداد میں طلبہ اور ان کے نمائندوں کے ساتھ بات چیت کے بعد کیا گیا۔ رشیکیش کمار کی 22 اگست کو آئی آئی ٹی دہلی کے لیکچر ہال کمپلیکس (ایل ایچ سی) کی چھٹی منزل سے گرنے کے بعد موت ہو گئی تھی۔

پولیس کا کہنا ہے کہ کوئی خودکشی نوٹ برآمد نہیں ہوا اور موت کے حالات کی تحقیقات جاری ہیں۔ آئی آئی ٹی دہلی نے رشیکیش کے اہل خانہ کی مدد کے لیے بھی کئی اقدامات کا اعلان کیا ہے، جن میں طبی اخراجات کی واپسی اور ادارے کے خیراتی فنڈ سے مالی امداد شامل ہے۔ ای میل میں کہا گیا، "اس کے علاوہ ہم اساتذہ، طلبہ اور عملے کی رضاکارانہ عطیات سے ایک الگ فنڈ بھی قائم کریں گے تاکہ خاندان کی مدد کی جا سکے۔"

تحقیقات کے علاوہ آئی آئی ٹی دہلی نے ایک بیرونی محتسب (اومبڈسپرسن) مقرر کرنے کا بھی منصوبہ ظاہر کیا ہے، جو ایسے شکایتی معاملات پر توجہ دے گا جن کا حل ادارے کے داخلی نظام کے ذریعے نہ ہو سکے۔ اس مجوزہ نظام کی تفصیلات طلبہ نمائندوں سے مشاورت کے بعد طے کی جائیں گی۔

ادارے نے ان طلبہ کے لیے، جنہیں والدین جیسی معاونت کی ضرورت ہو، اساتذہ اور طلبہ مینٹروں پر مشتمل ایک اضافی سپورٹ سسٹم متعارف کرانے کا بھی اعلان کیا ہے۔ یہ اعلانات پیر کو ادارے کی انتظامیہ اور طلبہ کے درمیان ہونے والی متعدد ملاقاتوں کے بعد کیے گئے، جن میں ڈوگرا ہال، لیکچر ہال کمپلیکس، سینیٹ روم اور مین بلڈنگ میں بات چیت شامل تھی۔