اٹانگر
اروناچل پردیش کے وزیر اعلیٰ پیما کھانڈو نے جمعہ کو قدرتی وسائل کے تحفظ کے لیے نئے عزم کی ضرورت پر زور دیتے ہوئے کہا کہ صاف اور صحت مند ماحول ہی خوشحال مستقبل کی بنیاد ہے۔عالمی یومِ ماحولیات کے موقع پر اپنے پیغام میں پیما کھانڈو نے عوام سے اپیل کی کہ وہ فطرت کے تحفظ اور پائیدار ترقی کو فروغ دینے کے لیے مل کر کام کریں۔وزیر اعلیٰ نے سوشل میڈیا پر اپنی پوسٹ میں کہا کہ آئیے اپنے جنگلات، دریاؤں، جنگلی حیات اور قدرتی وسائل کے تحفظ کے عزم کی تجدید کریں۔ صاف اور صحت مند ماحول آنے والی نسلوں کے خوشحال مستقبل کی بنیاد ہے۔
انہوں نے کہا کہ آئیے مل کر فطرت کا تحفظ کریں اور ایک زیادہ سرسبز اور پائیدار دنیا کی تعمیر کریں۔ساتھ ہی انہوں نے عالمی یومِ ماحولیات کے موقع پر عوام کو مبارکباد بھی پیش کی۔نائب وزیر اعلیٰ چاؤنا مین نے بھی ماحولیات کے تحفظ کی اہمیت پر زور دیتے ہوئے فطرت کو انسانیت کی ’’سب سے بڑی وراثت اور مشترکہ ذمہ داری‘‘ قرار دیا۔
انہوں نے ایکس پر اپنی پوسٹ میں کہا کہ عالمی یومِ ماحولیات کے موقع پر آئیے اس ماحول کے تحفظ کے اپنے عزم کا اعادہ کریں جو ہماری زندگی کا سہارا ہے۔چاؤنا مین نے کہا کہ ریاست کے وسیع جنگلات، شفاف دریا اور غیر معمولی حیاتیاتی تنوع ہمیں مسلسل یہ یاد دلاتے ہیں کہ فطرت صرف ایک قیمتی وراثت ہی نہیں بلکہ ایک ایسی ذمہ داری بھی ہے جس کا تحفظ ضروری ہے۔
واضح رہے کہ عالمی یومِ ماحولیات ہر سال 5 جون کو منایا جاتا ہے، جس کا مقصد ماحولیات کے تحفظ کے بارے میں بیداری پیدا کرنا اور اس سلسلے میں عملی اقدامات کی حوصلہ افزائی کرنا ہے۔
