لکھنؤ
اتر پردیش کے وزیر اعلیٰ یوگی آدتیہ ناتھ نے بقرعید کے تہوار سے قبل ریاست میں سڑکوں پر نماز پڑھنے کے معاملے پر سخت بیان دیا ہے۔ وزیر اعلیٰ نے کہا ہے کہ اگر نماز پڑھنی ہے تو آپ شفٹ میں پڑھیں۔ اگر لوگ محبت سے مان لیں تو ٹھیک ہے، ورنہ دوسرا طریقہ اپنایا جائے گا۔ انہوں نے یہ بیان دارالحکومت لکھنؤ میں ایک پروگرام کے دوران دیا۔
وزیر اعلیٰ نے کہا کہ لوگ مجھ سے پوچھتے ہیں کہ کیا واقعی آپ کے اتر پردیش میں سڑکوں پر نماز نہیں ہوتی؟ میں کہتا ہوں بالکل نہیں ہوتی۔ آپ جا کر دیکھ لیں، نہیں ہوتی۔ سڑکیں چلنے کے لیے ہیں، کوئی بھی شخص آ کر چوراہے پر تماشا نہیں بنا سکتا۔ اسے سڑک روکنے کا کیا حق ہے؟ آمد و رفت میں رکاوٹ ڈالنے کا کون سا اختیار ہے؟ جہاں اس کی جگہ مقرر ہو وہاں جا کر کریں۔
انہوں نے مزید کہا کہ لوگوں نے مجھ سے پوچھا کہ یہ کیسے ہوگا، ہماری تعداد زیادہ ہے۔ ہم نے کہا شفٹ میں کر لو۔ اگر تمہارے گھر میں جگہ نہیں ہے تو بھائی اپنی تعداد کنٹرول کرو۔ اور اگر استطاعت نہیں ہے تو بے وجہ تعداد کیوں بڑھا رہے ہو؟ اگر آپ کو نظام کے ساتھ رہنا ہے تو قانون اور قواعد کو ماننا شروع کریں۔
وزیر اعلیٰ نے کہا کہ قانون کی حکمرانی ہوگی اور اسے سب پر یکساں طور پر نافذ کیا جائے گا۔ نماز پڑھنا ضروری ہے تو آپ شفٹ میں پڑھیں، ہم اسے نہیں روکیں گے، لیکن سڑک پر نہیں۔ سڑک عام شہری، بیمار شخص، مزدور، ملازم، تاجر سب کے لیے ہے، اسے بند نہیں ہونے دیں گے۔ حکومت کا نظام سب کے لیے برابر ہے۔
انہوں نے مزید کہا کہ ہم نے کہا کہ ہم سڑکوں پر افراتفری نہیں پھیلنے دیں گے۔ اگر لوگ محبت سے مان لیں تو ٹھیک ہے، ورنہ دوسرا طریقہ بھی اپنایا جائے گا۔ ہمارا کام بات چیت کرنا ہے، اگر بات چیت سے نہ مانیں تو پھر سختی بھی دیکھی جا سکتی ہے۔ بریلی میں لوگوں نے تجربہ کیا، انہوں نے اپنی طاقت دیکھ لی۔ اس لیے حکومت پورے نظام کو قواعد کے مطابق چلانا چاہتی ہے۔
