نئی دہلی/ آواز دی وائس
اتر پردیش کے وزیر اعلیٰ یوگی آدتیہ ناتھ دہلی کے دورے پر ہیں۔ یہاں انہوں نے آج وزیر اعظم نریندر مودی سے ملاقات کی۔ دونوں رہنماؤں کے درمیان تقریباً 45 منٹ تک ملاقات ہوئی، جس کے دوران کابینہ میں توسیع اور 2027 کے انتخابات کو لے کر غور و خوض کیا گیا۔ وزیر اعظم سے ملاقات کے بعد وزیر اعلیٰ یوگی، وزیر داخلہ امیت شاہ سے بھی ملاقات کریں گے۔ ان ملاقاتوں کے بعد کابینہ میں توسیع کے حوالے سے قیاس آرائیاں تیز ہو گئی ہیں۔
اتر پردیش کی کابینہ میں اس وقت کئی عہدے خالی ہیں۔ سال 2024 کے انتخابات کے بعد جتیندر پرساد اور انوپ پردھان کو مرکز میں وزیر بنایا گیا تھا، جس کے بعد کابینہ میں متعدد نشستیں خالی ہو گئیں۔ خیال کیا جا رہا ہے کہ آنے والے وقت میں یوگی کابینہ میں توسیع ہو سکتی ہے، اسی حوالے سے مشاورت کا سلسلہ جاری ہے۔
وزیر اعلیٰ یوگی کی اس ملاقات پر سب کی نظریں ٹکی ہوئی ہیں، کیونکہ اس وقت دہلی میں اتر پردیش کے دونوں نائب وزرائے اعلیٰ کیشو پرساد موریہ اور برجیش پاٹھک بھی موجود ہیں۔
نتن نبین اور جے پی نڈا سے بھی ملاقات کریں گے وزیر اعلیٰ یوگی
دہلی کے دورے کے دوران وزیر اعلیٰ یوگی بی جے پی کے کئی سینئر رہنماؤں سے بھی ملاقات کریں گے۔ ان میں بی جے پی کے قومی عاملہ کے صدر نتن نبین اور جے پی نڈا شامل ہیں۔ شام کے وقت وزیر اعلیٰ ان دونوں رہنماؤں سے ملاقات کریں گے۔
کابینہ میں کئی عہدے خالی
اتر پردیش کی کابینہ میں اس وقت 54 وزیر ہیں، جبکہ زیادہ سے زیادہ 60 وزرا ہو سکتے ہیں۔ اگلے سال یعنی 2027 میں اسمبلی انتخابات ہونے والے ہیں، اسی وجہ سے اس کی تیاریاں ابھی سے تیز کر دی گئی ہیں۔ اسی کو مدنظر رکھتے ہوئے باقی ماندہ عہدوں کو پُر کرنے کی تیاری کی جا رہی ہے۔ اس کابینہ توسیع میں ذات پات کے ساتھ ساتھ علاقائی توازن کو بھی مدنظر رکھنے کی کوشش کی جائے گی۔
