چنئی

تمل ناڈو کے وزیر اعلیٰ سی جوزف وجے بدھ کے روز نئی دہلی میں وزیر اعظم نریندر مودی سے ملاقات کریں گے، جہاں وہ ریاست سے متعلق مختلف اہم امور پر تبادلۂ خیال کریں گے۔اس ماہ کے آغاز میں عہدہ سنبھالنے کے بعد قومی دارالحکومت کا یہ ٹی وی کے  سربراہ کا پہلا سرکاری دورہ ہوگا۔

اگرچہ وجے کے دورے کا تفصیلی سرکاری پروگرام جاری نہیں کیا گیا، تاہم ذرائع کے مطابق وہ صبح 10 بجے چنئی ہوائی اڈے سے نئی دہلی کے لیے روانہ ہوں گے۔وزیر اعظم نریندر مودی کے ساتھ ان کی ملاقات شام 4:30 بجے طے ہے، جس کے دوران وہ ریاست کے دیرینہ مطالبات پر مشتمل ایک یادداشت (میمورنڈم) پیش کریں گے۔توقع ہے کہ اس مطالباتی چارٹر میں فلاحی اور بنیادی ڈھانچے کے منصوبوں کے لیے مالی امداد، ترقیاتی منصوبوں کی منظوری اور میکیداتو آبی تنازع کے حل جیسے معاملات شامل ہوں گے۔

ذرائع نے یہ بھی بتایا کہ وزیر اعلیٰ نرملا سیتا رمن سے بھی ملاقات کر سکتے ہیں تاکہ ریاست میں جاری ترقیاتی منصوبوں کے لیے مالی تعاون کی درخواست کی جا سکے۔اس کے علاوہ، دورے کے دوران سی جوزف وجے کی کانگریس رہنماؤں سونیا گاندھی اور راہل گاندھی سے بھی ملاقات متوقع ہے۔