نئی دہلی
دہلی کی وزیر اعلیٰ ریکھا گپتا نے منگل کے روز کنّاٹ پلیس میں این ڈی ایم سی کے دو روزہ فلاور فیسٹیول کا افتتاح کیا، جس میں دارالحکومت کے قلب میں موسمی پھولوں اور مختلف پھولوں پر مبنی نمائشوں نے لوگوں کو اپنی جانب متوجہ کیا۔ این ڈی ایم سی نے یہ فیسٹیول کنّاٹ پلیس کے سینٹرل پارک میں منعقد کیا۔ تقریب کا آغاز ایک مختصر افتتاحی پروگرام سے ہوا جس میں این ڈی ایم سی کے عہدیداران اور شہریوں نے شرکت کی۔
وزیر اعلیٰ گپتا نے این ڈی ایم سی کے عہدیداروں کو مبارکباد دیتے ہوئے کہا کہ کونسل نے دہلی کی سرسبز اور مثبت شبیہ بنانے میں اہم کردار ادا کیا ہے۔انہوں نے افتتاح کے موقع پر کہا، "لوگ ٹیولپ کے پھولوں کے ساتھ تصاویر کھنچوانے کے لیے کشمیر جاتے تھے، اب انہیں وہاں جانے کی ضرورت نہیں، مرکزی دہلی میں وافر مقدار میں ٹیولپ موجود ہیں۔
انہوں نے مزید کہا كہ چاہے جی 20 جیسا بڑا پروگرام ہو یا حالیہ اے آئی انڈیا امپیکٹ سمٹ، این ڈی ایم سی نے علاقے کو صاف ستھرا رکھنے اور ہزاروں ٹیولپ کے پھول لگانے میں قابلِ تعریف کام کیا ہے۔وزیر اعلیٰ نے دہلی کی دیگر شہری ایجنسیوں سے بھی اپیل کی کہ وہ قومی دارالحکومت میں مزید سبز مقامات پیدا کرنے کے لیے این ڈی ایم سی سے رہنمائی حاصل کریں۔
انہوں نے کہا كہ این ڈی ایم سی ملک میں سبز مقامات پیدا کرنے کے لیے ایک مثالی شہری کونسل بن چکی ہے۔ ہم چاہتے ہیں کہ پوری دہلی اسی طرح سرسبز اور پُررونق ہو۔انہوں نے یہ بھی کہا کہ اگر ضرورت پڑی تو دہلی حکومت دیگر ایجنسیوں کے باغبانی محکموں کو این ڈی ایم سی کے تحت تربیت کے لیے بھیجے گی۔
وزیر اعلیٰ نے مزید کہا کہ دہلی حکومت شہر بھر میں ہریالی بڑھانے کے لیے این ڈی ایم سی کو تمام ضروری وسائل فراہم کرے گی۔فیسٹیول میں مختلف پھولوں کی آرائش، خوبصورت لینڈ اسکیپ نمائشیں اور باغبانی سے متعلق پیشکشیں شامل ہیں، جن کا مقصد شہری باغبانی اور سبز شعور کو فروغ دینا ہے۔
عہدیداروں کے مطابق دن بھر خاندان، دفتری ملازمین اور صبح کی سیر کرنے والے افراد پارک میں رک کر نمائش دیکھتے اور تصاویر بنواتے رہے۔این ڈی ایم سی حکام نے بتایا کہ یہ فیسٹیول 4 مارچ تک جاری رہے گا اور دونوں دنوں کے دوران عوام کی مسلسل آمد متوقع ہے کیونکہ مقام عوام کے لیے کھلا رہے گا۔
حکام کے مطابق یہ سالانہ تقریب بہار کے موسم میں کنّاٹ پلیس کے علاقے کو رنگین بنانے اور باغبانی میں دلچسپی کو فروغ دینے کی این ڈی ایم سی کی کوششوں کا حصہ ہے۔
.gif)
