ممبئی: ہندوستانی ہوائی اڈہ اتھارٹی (اے اے آئی) نے پیر کے روز اعلان کیا کہ ہندوستان اور پاکستان کے درمیان فوجی کشیدگی کے پیش نظر گزشتہ ہفتے عارضی طور پر بند کیے گئے 32 ہوائی اڈوں پر شہری پروازوں کی آمد و رفت دوبارہ شروع کی جا رہی ہے۔ ہندوستان اور پاکستان کے درمیان کشیدہ صورتِ حال کے سبب شری نگر اور امرتسر سمیت شمالی و مغربی ہندوستان کے 32 ہوائی اڈوں پر 9 مئی سے 15 مئی تک شہری پروازوں کی سرگرمیاں معطل کر دی گئی تھیں۔

ہفتے کے روز ہندوستان اور پاکستان کے درمیان زمین، فضا اور سمندر میں تمام قسم کی فائرنگ اور فوجی کارروائیوں کو فوری طور پر روکنے پر اتفاق ہوا تھا۔ پیر کو جاری کردہ ایک بیان میں سرکاری ملکیت رکھنے والی بھارتی ہوائی اڈہ اتھارٹی نے کہا کہ وہ تمام 32 ہوائی اڈے جو 15 مئی کو صبح 5:29 بجے تک شہری پروازوں کے لیے بند کیے گئے تھے، اب فوری اثر سے دوبارہ فعال کر دیے گئے ہیں۔

بیان میں کہا گیا ہے: مسافروں کو مشورہ دیا جاتا ہے کہ وہ اپنی پروازوں سے متعلق معلومات براہِ راست ایئر لائنز سے حاصل کریں اور تازہ ترین معلومات کے لیے ایئر لائنز کی ویب سائٹس پر نگاہ رکھیں۔ اے اے آئی نے دیگر ہوابازی حکام کے ساتھ مل کر نوٹس ٹو ایئرمین جاری کیے تھے، جن میں شمالی اور مغربی ہندوستان کے 32 ہوائی اڈوں کو تمام شہری پروازوں کے لیے عارضی طور پر بند کرنے کا اعلان کیا گیا تھا۔

اے اے آئی کی جانب سے نوٹس جاری کرنے کے بعد شری نگر بین الاقوامی ہوائی اڈہ اب پروازوں کی سرگرمیوں کے لیے مکمل طور پر تیار ہے۔ گزشتہ ہفتے ہندوستان اور پاکستان کے درمیان فوجی کشیدگی کے باعث ملک کے شمالی و مغربی علاقوں کے 32 ہوائی اڈے عارضی طور پر بند کر دیے گئے تھے۔ اس سلسلے میں اے اے آئی اور دیگر ایوی ایشن ایجنسیوں کی جانب سے مسلسل نوٹس ٹو ایئرمین جاری کیے گئے تھے۔

ایک سرکاری اہلکار نے پیر کو بتایا: ایئرڈروم بندش کا نوٹم منسوخ کر دیا گیا ہے اور شری نگر ہوائی اڈہ پروازوں کے لیے تیار ہے۔ انہوں نے مزید کہا کہ ایئر لائنز کی جانب سے پروازوں کی بحالی کے بارے میں باضابطہ ردعمل کا انتظار کیا جا رہا ہے۔ قابلِ ذکر بات یہ ہے کہ ہوائی اڈے کی عارضی بندش کے باعث شری نگر سے حج پروازیں بھی متاثر ہوئی تھیں۔