نئی دہلی: صحتِ عامہ کے جریدے دی لانسیٹ پلینیٹری ہیلتھ میں شائع ایک تجزیے میں موسمیاتی تبدیلی اور سالمونیلا بیکٹیریا میں بڑھتی ہوئی اینٹی بایوٹک مزاحمت کے درمیان مضبوط تعلق پایا گیا ہے۔ محققین کے مطابق بدلتے موسمی حالات کے سبب دنیا بھر میں اینٹی مائیکروبیل مزاحمتی جینز میں تقریباً 10 فیصد اضافہ ہوا ہے۔

مطالعے میں بتایا گیا کہ تجزیہ کیے گئے 82 فیصد ممالک میں سالمونیلا بیکٹیریا میں اینٹی بایوٹک مزاحمتی جینز میں اضافہ ریکارڈ کیا گیا۔ سالمونیلا وہ بیکٹیریا ہے جو فوڈ پوائزننگ اور ٹائیفائیڈ جیسی بیماریوں کا سبب بنتا ہے۔ تحقیق کے مطابق موسمیاتی تبدیلی سے متعلق مزاحمت میں سب سے زیادہ اضافہ مشرقِ وسطیٰ اور شمالی افریقہ میں دیکھا گیا، اس کے بعد جنوبی ایشیا اور سب صحارا افریقہ کا نمبر رہا۔

چینی اکیڈمی آف سائنسز کے سائنس دانوں سمیت محققین نے کہا کہ اینٹی مائیکروبیل مزاحمت (اے ایم آر) میں اضافہ صرف درجہ حرارت بڑھنے کی وجہ سے نہیں بلکہ بارش کے بدلتے ہوئے نظام سے بھی متاثر ہو رہا ہے۔ انہوں نے کہا کہ ماحولیاتی تبدیلیاں بیکٹیریا کی اینٹی بایوٹکس کے خلاف خود کو ڈھالنے کی صلاحیت کو تیز کرتی دکھائی دیتی ہیں۔

اس تجزیے میں 1940 سے 2023 کے درمیان 139 ممالک اور خطوں سے جمع کیے گئے سالمونیلا کے 4 لاکھ 80 ہزار سے زیادہ جینوم نمونوں کا جائزہ لیا گیا۔ مطالعے میں پایا گیا کہ اس مدت کے دوران سالمونیلا میں اینٹی مائیکروبیل مزاحمتی جینز کی عالمی اوسط مقدار میں 38 فیصد اضافہ ہوا۔

محققین نے لکھا، “موسمیاتی تبدیلی سالمونیلا کے اینٹی مائیکروبیل مزاحمتی جینز میں عالمی سطح پر 10 فیصد اضافے سے وابستہ ہے، جبکہ 100 میں سے 82 ممالک میں اس میں اضافہ دیکھا گیا۔” سائنس دان طویل عرصے سے خبردار کرتے رہے ہیں کہ موسمیاتی تبدیلی کے بگڑتے اثرات، جیسے بڑھتا ہوا درجہ حرارت اور شدید موسمی واقعات، متعدی بیماریوں کے پھیلاؤ اور اینٹی بایوٹکس کے زیادہ استعمال کا سبب بن سکتے ہیں، جس سے اینٹی مائیکروبیل مزاحمت مزید بڑھے گی۔

مطالعے میں یہ بھی اندازہ لگایا گیا کہ مختلف موسمیاتی اخراج کے منظرناموں کے تحت 2100 تک سالمونیلا میں مزاحمتی جینز کس طرح تبدیل ہو سکتے ہیں۔ محققین نے پایا کہ اگر ممالک کم اخراج والے موسمیاتی اہداف حاصل کرنے میں کامیاب ہو جائیں اور اینٹی بایوٹکس کے ذمہ دارانہ استعمال کو بہتر بنائیں تو سب سے زیادہ اخراج والے منظرنامے کے مقابلے میں مزاحمتی جینز کی سطح میں 24 فیصد تک کمی لائی جا سکتی ہے۔ محققین نے اس بات پر زور دیا کہ اینٹی مائیکروبیل مزاحمت کی نگرانی اور اس سے نمٹنے کے لیے عالمی حکمتِ عملیوں میں موسمیاتی تبدیلی کو بھی شامل کیا جانا چاہیے۔