نئی دہلی : آل انڈیا مجلس اتحاد المسلمین (AIMIM) کے سربراہ اسدالدین اویسی نے بھارتیہ جنتا پارٹی (بی جے پی) کو ایک مضبوط سیاسی مخالف قرار دیتے ہوئے کہا ہے کہ یہ جماعت چوبیس گھنٹے متحرک رہتی ہے۔ تاہم، انہوں نے کانگریس لیڈر راہول گاندھی کے "ووٹ چوری" کے الزامات سے خود کو الگ رکھا ہے۔

ایک انٹرویو میں اویسی نے کہا: "راہول گاندھی اور ان کی پارٹی اپنی بات خود کرنے کی اہل ہے۔ لیکن میرا ماننا ہے کہ اگر بی جے پی سے مقابلہ کرنا ہے تو ان کی طرح محنت کرنی ہوگی۔ بی جے پی دن رات کام کرتی ہے، اور ہمارا کام ہونا چاہیے کہ ہم ان کی ہر چال پر نظر رکھیں۔"

اویسی نے یاد دلایا کہ 2009 یا 2014 میں ان کے حلقے میں ووٹر لسٹ میں گڑبڑ ہوئی تھی، جہاں ڈپلیکیٹ اندراجات کو انہوں نے چیلنج کیا تھا۔ انہوں نے اپوزیشن جماعتوں کو خبردار کیا کہ "بی جے پی ایک لمحے میں اپنا کام کر جاتی ہے، اس لیے ہمیں ہوشیار رہنا ہوگا اور ووٹر لسٹوں کو مسلسل چیک کرتے رہنا چاہیے۔

" راہول گاندھی اب تک دو پریس کانفرنسز کر چکے ہیں جن میں انہوں نے ووٹر لسٹ میں سنگین دھاندلیوں کا دعویٰ کیا ہے۔ پہلی پریس کانفرنس 7 اگست کو دہلی میں ہوئی، جہاں انہوں نے مہادیوپورا (بنگلور) کے حلقے میں 1 لاکھ سے زائد جعلی اور دوہرے ووٹوں کی موجودگی کا الزام لگایا۔

دوسری کانفرنس ستمبر میں ہوئی، جس میں انہوں نے چیف الیکشن کمشنر گیانیش کمار پر جانبداری کا الزام لگایا اور کہا کہ الند (کرناٹک) میں ووٹر حذف کرنے کی کوشش پر کمیشن خاموش ہے۔ اویسی نے بہار میں ووٹر لسٹ کی خصوصی جانچ (SIR) پر بھی سوال اٹھایا اور کہا کہ "یہ کام جلد بازی میں کیا گیا، اور شہریت کی جانچ وزارتِ داخلہ کی ذمہ داری ہے، الیکشن کمیشن کی نہیں۔"

انہوں نے خبردار کیا کہ اگر لوگوں نے اپنی معلومات نہ چیک کیں تو الیکشن والے دن بڑا مسئلہ کھڑا ہو سکتا ہے۔ AIMIM کے بہار صدر اخترال ایمان نے اس معاملے پر سپریم کورٹ سے رجوع بھی کیا ہے۔ بہار میں اسمبلی انتخابات دو مراحل میں ہوں گے: 6 اور 11 نومبر کو ووٹنگ جب کہ 14 نومبر کو نتائج کا اعلان ہوگا۔

اویسی نے دعویٰ کیا کہ ابتدائی ووٹر لسٹ سے 65 لاکھ نام حذف کیے گئے تھے، اور اب مزید 3.5 لاکھ ووٹروں کے نام بھی نکال دیے گئے ہیں۔ ان کے مطابق بہار ایک بڑی اور دیہی آبادی والی ریاست ہے، اور انتخابی عمل میں اس طرح کی جلد بازی سے عوامی اعتماد متاثر ہو سکتا ہے۔ الیکشن کمیشن کی جاری کردہ حتمی فہرست کے مطابق ریاست میں ووٹرز کی تعداد اب 7.42 کروڑ ہے، جبکہ جون 2025 میں یہ تعداد 7.89 کروڑ تھی۔