پونے: ہندوستان کے سابق آرمی چیف جنرل منوج نرونے نے کہا ہے کہ پاکستان کی جانب سے دہشت گردی کی مسلسل حمایت کے باعث ہندوستان کی فوری توجہ مغربی سرحد پر مرکوز ہے، لیکن طویل مدت میں چین مختلف شعبوں میں نئی دہلی کا سب سے بڑا حریف بن کر سامنے آئے گا۔ جنرل نرونے نے چین کے لیے ’’دشمن‘‘ کے بجائے ’’حریف‘‘ کا لفظ استعمال کرتے ہوئے کہا کہ ہندوستان کو بیجنگ کے ساتھ اپنے اختلافات مذاکرات اور سفارتی ذرائع سے حل کرنے کی کوشش کرنی چاہیے، تاہم کسی بھی ممکنہ مہم جوئی کو روکنے کے لیے مضبوط فوجی صلاحیت اور مؤثر دفاعی تیاری ضروری ہے۔
وہ جمعرات کو اپنی نئی کتاب ’دی کیوریئس اینڈ دی کلاسیفائیڈ: ان ارتھنگ ملٹری متھس اینڈ مسٹریز‘ کی تقریبِ اجرا سے خطاب کر رہے تھے۔ نرونے نے کہا کہ پاکستان اور چین دونوں ہندوستان کے لیے مختلف نوعیت کے چیلنج ہیں۔ ہندوستان دونوں ممالک کے ساتھ جنگیں لڑ چکا ہے اور دونوں کے ساتھ سرحدی تنازعات بھی موجود ہیں۔ انہوں نے کہا، ’’پاکستان اور چین بالکل مختلف معاملے ہیں۔ ہم دونوں کے ساتھ جنگیں لڑ چکے ہیں اور ہماری سرحدیں ابھی تک پوری طرح طے نہیں ہیں، اس لیے دونوں ہمیشہ ہمارے لیے خطرے اور چیلنج کے طور پر ہماری نظر میں رہیں گے۔‘
‘ سابق آرمی چیف نے کہا کہ پاکستان کی مسلسل دہشت گردی کی حمایت کی وجہ سے ہندوستان کی توجہ فوری طور پر مغربی سرحدوں کی طرف ہے۔ تاہم، آنے والے برسوں میں چین ہندوستان کا اہم ترین حریف ہوگا۔ انہوں نے کہا، ’’طویل مدت میں اور آنے والے برسوں میں چین ہمارا سب سے بڑا حریف ہوگا۔ میں جان بوجھ کر حریف کا لفظ استعمال کر رہا ہوں، دشمن کا نہیں۔‘‘ نرونے کے مطابق چین سیاسی، اقتصادی، تجارتی اور فوجی سمیت تقریباً ہر شعبے میں ہندوستان کا مقابلہ کرے گا۔ انہوں نے کہا کہ جہاں مسابقت ہوتی ہے، وہاں کسی نہ کسی حد تک تنازع بھی پیدا ہوتا ہے۔ انہوں نے زور دیا کہ ایسے اختلافات کو طاقت کے استعمال کے بجائے بات چیت اور مذاکرات کے ذریعے حل کیا جانا چاہیے۔
تاہم انہوں نے واضح کیا کہ طاقت کا استعمال آخری راستہ ہونا چاہیے اور ہندوستان کو ہر وقت اپنی فوجی تیاری مضبوط رکھنی ہوگی۔ جنرل نرونے نے کہا، ’’مسلح افواج کو ہر وقت تیار رہنا چاہیے۔ کسی کو بھی طاقت کے استعمال یا کسی مہم جوئی کی کوشش سے روکنے کے لیے مضبوط دفاعی صلاحیت ضروری ہے۔‘‘
ہندوستان کے دیگر پڑوسی ممالک کے بارے میں سابق آرمی چیف نے کہا کہ نئی دہلی کو نیپال، بھوٹان، بنگلہ دیش اور میانمار سمیت اپنے تمام پڑوسی ممالک میں استحکام کے لیے کام کرنا چاہیے۔ انہوں نے کہا، ’’آپ اپنے پڑوسیوں کا انتخاب نہیں کر سکتے، نہ حقیقی زندگی میں اور نہ ہی جغرافیائی سیاست میں۔ آپ کو جو کچھ ملا ہے، اسی کے ساتھ بہترین طریقے سے آگے بڑھنا ہوتا ہے۔‘‘
نرونے نے کہا کہ ایک مستحکم پڑوس ہندوستان کے امن اور ترقی کے لیے ضروری ہے۔ پڑوسی ممالک میں عدم استحکام کے نتیجے میں پناہ گزینوں کی آمد، اسمگلنگ، منشیات کی غیر قانونی تجارت اور ہتھیاروں کی نقل و حرکت جیسے مسائل پیدا ہو سکتے ہیں۔ انہوں نے میانمار سے ہندوستان آنے والے پناہ گزینوں کا حوالہ دیتے ہوئے کہا کہ اگر کوئی پڑوسی ملک بحران کا شکار ہے تو اس پر خوش نہیں ہونا چاہیے، کیونکہ سرحدی عدم استحکام کا براہِ راست اثر ہندوستان پر بھی پڑتا ہے۔ سابق آرمی چیف نے کہا کہ اسی لیے ہندوستان کو اپنے پڑوسی ممالک میں استحکام اور امن قائم رکھنے میں مدد کرنی چاہیے۔
