چھتیس گڑھ۔ 21 ماؤ باغیوں نے ہتھیاروں کے ساتھ ہتھیار ڈالے جن میں 13 خواتین شامل ہیں۔نارتھ بستر کانکیر (چھتیس گڑھ) 26 اکتوبر۔ بستر کے انسپکٹر جنرل پی سندر راج کے مطابق ضلع کانکیر میں اتوار کے روز کل 21 ماؤ باغیوں نے ہتھیاروں سمیت خود سپردگی کی۔ ان میں 13 خواتین بھی شامل ہیں۔یہ تمام باغی کیوماری کسکوڈو ایریا کمیٹی کے رکن تھے جو کیشکل ڈویژن کے نارتھ سب زونل بیورو کے تحت کام کر رہی تھی۔اعلیٰ پولیس افسر کے مطابق خود سپردگی کرنے والوں میں چار ڈویژن کمیٹی ممبران شامل ہیں جن میں ڈویژن کمیٹی کے سکریٹری مکیس بھی ہیں۔ ان کے ساتھ نو ایریا کمیٹی ممبران اور آٹھ عام پارٹی ممبران نے بھی ہتھیار ڈال دیے۔

انہوں نے تین اے کے 47 رائفلیں چار ایس ایل آر رائفلیں دو آئی این ایس اے ایس رائفلیں چھ 303 بور رائفلیں دو سنگل شاٹ رائفلیں اور ایک بی جی ایل ہتھیار پولیس کے حوالے کیے۔آئی جی بستر سندر راج نے اسے ریاست میں بائیں بازو کی انتہا پسندی پر قابو پانے کی کوششوں میں ایک فیصلہ کن قدم قرار دیا اور بتایا کہ خود سپردگی کرنے والے ان باغیوں کی بحالی اور دوبارہ سماج میں شمولیت کا عمل جاری ہے۔انہوں نے کہا کہ آج ضلع کانکیر میں ایک اور اہم قدم اٹھایا گیا جب 21 مزید ماؤ باغیوں نے رضاکارانہ طور پر مرکزی دھارے میں واپسی کا انتخاب کیا۔ یہ ہمارے ان مسلسل اقدامات کی کامیابی کی علامت ہے جن کا مقصد بائیں بازو کی انتہا پسندی کے اثرات کو ختم کرنا عوام کا اعتماد بحال کرنا اور بستر میں امن و ترقی کو فروغ دینا ہے۔

انہوں نے مزید کہا کہ ان 21 باغیوں کی بحالی اور سماجی ادغام کا عمل جاری ہے جو ایک محفوظ اور جامع معاشرے کے قیام کے ہمارے عزم کی توثیق کرتا ہے۔ ہم ایک بار پھر باقی ماؤ باغیوں سے اپیل کرتے ہیں کہ وہ امن کا راستہ اختیار کریں اور سماج میں واپس آئیں ورنہ نتائج بھگتنے کے لیے تیار رہیں۔یہ واقعہ چھتیس گڑھ میں بائیں بازو کی انتہا پسندی کے خلاف لڑائی کے ایک اہم مرحلے کے بعد پیش آیا ہے۔ 17 اکتوبر کو بستر کے جگدلپور میں ایک بڑے پروگرام کے دوران 208 نکسلائٹوں نے ہندستانی آئین کو ہاتھ میں لے کر خود سپردگی کی تھی اور مرکزی دھارے میں واپس آئے تھے۔

اس سے پہلے 21 اکتوبر کو چھتیس گڑھ کے وزیر اعلیٰ وشنو دیو سائی نے پولیس یادگار دن کے موقع پر نکسل ازم کے خلاف لڑنے والے پولیس اہلکاروں کی بہادری اور خدمت کو سراہا۔وزیر اعلیٰ نے کہا کہ پولیس یادگار دن ان اہلکاروں کی قربانیوں کی یاد میں منایا جا رہا ہے جنہوں نے فرض کی راہ میں جانیں نچھاور کیں۔ ہمارے جوان سخت ترین حالات میں رہ کر عوام کی حفاظت کو یقینی بناتے ہیں۔نکسل ازم کے خلاف جنگ پر وزیر اعلیٰ نے کہا کہ ہمارے سیکیورٹی اہلکاروں نے انتہائی بہادری کا مظاہرہ کیا ہے۔ انہوں نے نہ صرف نکسلوں کو پسپا کیا بلکہ علاقے میں ترقی کے دروازے بھی کھولے۔مرکز اور ریاستی حکومت کا ہدف ہے کہ 31 مارچ 2026 تک چھتیس گڑھ سے نکسل ازم کو پوری طرح ختم کر دیا جائے۔