چھتیس گڑھ: میتری باغ چڑیا گھر نے شدید گرمی کے درمیان جانوروں کے لیے ٹھنڈک کے اقدامات کیے
درگ
چھتیس گڑھ میں شدید گرمی کی لہر جاری ہے، جہاں درجہ حرارت 44 سے 45 ڈگری سیلسیس تک پہنچ رہا ہے۔ ایسے میں درگ ضلع کے بھیلائی میں واقع میتری باغ چڑیا گھر نے اپنے جنگلی جانوروں کو گرمی سے بچانے کے لیے وسیع انتظامات کیے ہیں۔ اس چڑیا گھر میں 400 سے زائد نایاب اقسام کے جانور موجود ہیں۔
چڑیا گھر کی انتظامیہ نے جانوروں کے تحفظ اور آرام کو یقینی بنانے کے لیے مختلف ٹھنڈک فراہم کرنے والے اقدامات کیے ہیں، جن میں اسپرنکلرز، مصنوعی آبشاریں، سایہ دار باڑیں اور خوراک میں تبدیلی شامل ہے، تاکہ شدید گرمی کے اثرات کو کم کیا جا سکے۔
میتر ی باغ زو کے انچارج اور ویٹرنری ڈاکٹر جین نے بتایا کہ تمام جانوروں کا خاص خیال رکھا جا رہا ہے۔ انہوں نے کہا کہ گزشتہ چند دنوں میں شدید گرمی کی وجہ سے درجہ حرارت 44-45 ڈگری سیلسیس تک پہنچ گیا ہے۔ یہ حالات انسانوں اور جنگلی حیات دونوں کے لیے نقصان دہ ہیں۔ اسی لیے میتری باغ انتظامیہ نے خصوصی تیاریاں کی ہیں۔
انہوں نے مزید وضاحت کرتے ہوئے کہا کہ شیروں کے لیے ہم نے ان کے باڑوں میں ٹائفہ میٹس اور کولر نصب کیے ہیں۔ اس کے علاوہ مصنوعی آبشاریں اور اسپرنکلرز بھی لگائے گئے ہیں تاکہ انہیں مسلسل ٹھنڈک ملتی رہے۔انہوں نے بتایا کہ اسی طرح کے انتظامات دیگر باڑوں میں بھی کیے گئے ہیں۔ "ہرن، سامبر اور بلیک بک کے باڑوں میں ہم نے موٹر پمپ سے جڑی پائپ لائن کے ذریعے اسپرنکلرز لگائے ہیں، جو پورے دن چلتے رہتے ہیں اور ماحول کو ٹھنڈا رکھتے ہیں۔
پرندوں اور بندروں کو گرمی سے بچانے کے لیے گرین نیٹس لگائے گئے ہیں۔ ڈاکٹر جین کے مطابق، ہم نے پرندوں اور بندروں کے حصوں میں گرین نیٹس نصب کیے ہیں، جو تقریباً 80 فیصد دھوپ کو روک کر انہیں گرمی سے محفوظ رکھتے ہیں۔
انہوں نے یہ بھی بتایا کہ گرمی کے دباؤ کی وجہ سے جانوروں کی خوراک میں بھی تبدیلی کی گئی ہے۔ ہم انہیں ہائیڈریشن کے لیے وٹامنز فراہم کر رہے ہیں، اور پانی سے بھرپور پھل جیسے تربوز اور خربوزہ خاص طور پر بندروں کو دیے جا رہے ہیں۔
ڈاکٹر جین نے خاص طور پر سفید شیروں کی دیکھ بھال کا ذکر کرتے ہوئے کہا کہ سفید شیر گرمی میں عام طور پر کم خوراک لیتے ہیں، اس لیے ہم ان کی غذا میں وٹامنز اور منرلز شامل کر رہے ہیں تاکہ وہ گرمی کے اثرات کا مقابلہ کر سکیں۔ اس وقت چڑیا گھر میں پانچ شیر موجود ہیں۔
انہوں نے مزید بتایا کہ ایک ویٹ موٹ (پانی سے بھری خندق) سسٹم بھی فعال کیا گیا ہے، جس میں مسلسل پانی بہتا رہتا ہے، تاکہ جانور جب چاہیں خود کو ٹھنڈا کر سکیں۔
دوسری جانب، چڑیا گھر آنے والے سیاحوں نے ان انتظامات کی تعریف کی اور لوگوں کو گرمی کے دوران احتیاط برتنے کا مشورہ دیا۔ ایک سیاح پون کمار پال نے کہا، "میتر ی باغ زو میں جانوروں کے لیے بہترین انتظامات کیے گئے ہیں۔ یہاں اسپرنکلرز اور پانی کا بھی مناسب بندوبست ہے۔
انہوں نے عوام کو نصیحت کرتے ہوئے کہ کہ اس شدید گرمی میں بلا ضرورت گھر سے باہر نہ نکلیں۔ جب بہت ضروری ہو تب ہی نکلیں، کیونکہ ہم بھی گرمی کی لہر کا سامنا کر رہے ہیں، اس لیے اپنی صحت کا خاص خیال رکھنا ضروری ہے۔
