مرلی دھر پروجیکٹس پرائیویٹ لمیٹڈ کمپنی کو پہلے ہی 4 کروڑ 25 لاکھ روپے ادا کیے جا چکے ہیں، جبکہ اب مزید 25 لاکھ روپے کا ڈیمانڈ ڈرافٹ بھی جمع کرایا جا رہا ہے۔جج نے مشاہدہ کیا کہ کافی رقم جمع ہو چکی ہے، اس لیے انہوں نے اداکار کو فوری طور پر جیل بھیجنے کا حکم دینے سے انکار کر دیا۔ اس فیصلے سے راجپال یادو کو بڑی راحت ملی ہے۔ سماعت کے دوران اداکار نے خود عدالت میں کہا کہ انہوں نے فلم بنانے کے لیے قرض لیا تھا۔ انہوں نے 2 کروڑ روپے پہلے ہی ادا کر دیے تھے، جبکہ باقی رقم کے تنازع کی وجہ سے یہ قانونی معاملہ شروع ہوا۔ انہوں نے بتایا کہ فلم پر کل 22 کروڑ روپے خرچ ہوئے تھے، جس میں تقریباً 17 کروڑ روپے کا نقصان ہوا۔ عدالت نے واضح انتباہ دیا کہ اگر باقی رقم مکمل طور پر ادا کر دی جائے تو پورا مقدمہ ختم کیا جا سکتا ہے۔

یہ پورا معاملہ 2010 کا ہے، جب راجپال یادو اپنی فلم  اتا پتہ لاپتہ  بنا رہے تھے۔ فلم فلاپ ہو گئی اور کمپنی کے دیے گئے چیک باؤنس ہو گئے، جس کے بعد معاملہ عدالت تک پہنچا۔ 2018 میں مجسٹریٹ کورٹ نے انہیں 6 ماہ کی سزا سنائی، جسے سیشن کورٹ نے بھی برقرار رکھا۔ کئی برسوں سے یہ قانونی لڑائی جاری ہے۔ فروری میں عدالت نے اس وقت کچھ راحت دی تھی جب اداکار نے مزید رقم جمع کرائی تھی، تاہم اب کی سماعت کافی اہم تھی۔ اگلی سماعت یکم اپریل کو مقرر کی گئی ہے۔