چنڈی گڑھ: وزیر اعظم نریندر مودی نے جمعہ کو کہا کہ چنڈی گڑھ کی ترقی کا فائدہ صرف مرکز کے زیر انتظام اس علاقے تک محدود نہیں بلکہ ہریانہ، پنجاب، ہماچل پردیش اور جموں و کشمیر کے لوگوں کو بھی پہنچتا ہے۔ انہوں نے صحت، تعلیم اور سڑکوں کے بنیادی ڈھانچے سے متعلق 4,700 کروڑ روپے سے زائد مالیت کے مختلف منصوبوں کا افتتاح اور سنگِ بنیاد رکھا۔

عوامی جلسے سے خطاب کرتے ہوئے وزیر اعظم نے چنڈی گڑھ کو منصوبہ بند ترقی کا ایک مثالی شہر قرار دیا اور کہا کہ این ڈی اے حکومت نے ہمیشہ اس کی ترقی کو ترجیح دی ہے۔ انہوں نے کہا، "آپ سب کے درمیان آکر مجھے بے حد خوشی محسوس ہو رہی ہے۔ چنڈی گڑھ صرف ایک شہر نہیں بلکہ ہندوستان میں ترقی کا ایک نمونہ ہے۔ یہ اپنی منصوبہ بند ترقی، بہتر طرزِ زندگی، اعلیٰ طبی سہولیات اور ماں چنڈیکا کی برکتوں کے لیے پہچانا جاتا ہے۔"

مودی نے کہا کہ چنڈی گڑھ کی ترقی این ڈی اے حکومت کے طرزِ حکمرانی کی ایک نمایاں مثال ہے۔ انہوں نے کہا، "چنڈی گڑھ کی ترقی سے یہاں کے لوگوں کی زندگی میں مثبت تبدیلی آئی ہے، لیکن اس کے فوائد ہریانہ، پنجاب اور ہماچل پردیش کے عوام تک بھی پہنچ رہے ہیں۔ صحت کے شعبے میں چنڈی گڑھ ایک اہم مرکز ہے، اور آج پی جی آئی چنڈی گڑھ میں جدید طبی سہولیات کو مزید وسعت دی جا رہی ہے، جس سے لاکھوں افراد مستفید ہوں گے۔"

وزیر اعظم نے عدالتی اصلاحات کا ذکر کرتے ہوئے کہا کہ نوآبادیاتی دور کے فوجداری قوانین کی جگہ بھارتیہ نیائے سنہتا نافذ کیے جانے کے بعد اس قانون کا عملی نفاذ سب سے پہلے چنڈی گڑھ میں شروع ہوا۔ انہوں نے کہا، "ڈیڑھ سال قبل ملک نے نظامِ انصاف میں ایک بڑی اصلاح کی۔ ہم نے تعزیری قانون کی جگہ بھارتیہ نیائے سنہتا نافذ کی، یعنی سزا پر مبنی نظام کے بجائے انصاف پر مبنی قانونی نظام متعارف کرایا، اور اس کا آغاز چنڈی گڑھ سے ہوا۔"

مودی نے اسمارٹ سٹی مشن کے تحت چنڈی گڑھ میں ہونے والی ترقیاتی سرگرمیوں کا بھی ذکر کیا۔ انہوں نے کہا کہ انٹیگریٹڈ کمانڈ اینڈ کنٹرول سینٹر، اسمارٹ ٹریفک مینجمنٹ، اسمارٹ پارکنگ اور ڈیجیٹل گورننس جیسے متعدد منصوبوں کے ذریعے شہر کو جدید طرز کا ہائی ٹیک شہر بنایا جا رہا ہے، جس پر اب تک 2,500 کروڑ روپے سے زیادہ خرچ کیے جا چکے ہیں۔

وزیر اعظم نے کہا کہ چنڈی گڑھ ہریانہ، پنجاب اور ہماچل پردیش کو آپس میں جوڑنے والا اہم مرکز ہے، جبکہ جموں و کشمیر کے لوگ بھی بالخصوص طبی سہولیات کے لیے یہاں آتے ہیں۔ انہوں نے کہا، "آج میں پہلے ہریانہ کے جیند میں تھا، یہاں سے پنجاب کے جالندھر جا رہا ہوں۔ چنڈی گڑھ پورے خطے کو جوڑنے والا شہر ہے، اور اس کی ترقی سے ہریانہ، پنجاب، ہماچل پردیش اور جموں و کشمیر کے عوام کو بھی فائدہ پہنچتا ہے۔" ہندوستان کے صحت کے شعبے کا ذکر کرتے ہوئے مودی نے کہا کہ گزشتہ ایک دہائی میں دنیا میں ہندوستان کی شناخت نمایاں طور پر بدلی ہے۔

انہوں نے کہا، "ایک وقت تھا جب دنیا ہندوستان کے طبی نظام کو لے کر فکر مند رہتی تھی۔ کورونا وبا کے دوران بھی دنیا کو ہندوستان کی فکر تھی، لیکن ہماری حکومت نے یہ تصور بدل دیا۔ وبا کے دوران ہندوستان نے مدد نہیں مانگی بلکہ دوسرے ممالک کی مدد کی۔ آج دنیا بھر سے لوگ علاج کے لیے ہندوستان آ رہے ہیں، اور یہ گزشتہ بارہ برسوں کی مخلصانہ کوششوں کا نتیجہ ہے۔"