نئی دہلی / آواز دی وائس

دہلی پولیس نے کہا کہ چیتانانند سرسوتی، جن کے خلاف مبینہ جنسی ہراسانی کا مقدمہ درج کیا گیا ہے، نے اپنے افعال پر "کوئی ندامت" ظاہر نہیں کی ہے اور تفتیش کے دوران پولیس سے تعاون نہیں کر رہے ہیں۔

دہلی پولیس کے مطابق، ملزم نے وسانت کنج نارتھ پولیس اسٹیشن میں درج جنسی ہراسانی کے مقدمے سے متعلق پوچھ گچھ کے دوران "گول مول جواب" دیے ہیں۔ پولیس حکام نے مزید بتایا کہ وہ صرف اس وقت جواب دیتا ہے جب اس کے سامنے ثبوت رکھ کر سختی سے سوال کیا جاتا ہے۔

 دہلی پولیس نے کہا کہ چیتانانند سرسوتی کی دو خاتون ساتھیوں کو حراست میں لے کر اس سے آمنے سامنے بٹھایا گیا ہے۔ یہ دونوں خواتین پیر کو پوچھ گچھ میں شامل ہوئیں تھیں اور آج انہیں دوبارہ بلایا گیا۔ ملزم کے موبائل فون سے متعدد خواتین کے ساتھ چیٹ کے ثبوت ملے ہیں، جن میں وہ مبینہ طور پر انہیں ورغلانے اور متاثر کرنے کی کوشش کرتا نظر آ رہا ہے۔ پولیس کے مطابق، متعدد ڈسپلے پکچرز (ڈی پیز) کے اسکرین شاٹس اور ایئر ہوسٹس کے ساتھ لی گئی کئی تصاویر بھی اس کے فون سے برآمد کی گئی ہیں۔

دہلی پولیس نے مزید کہا کہ چیتانانند تفتیش میں تعاون نہیں کر رہا ہے۔ وہ اپنے افعال پر کوئی ندامت ظاہر نہیں کرتا اور بار بار جھوٹ بولتا ہے۔ وہ ٹال مٹول کے جوابات دیتا ہے اور صرف اس وقت ردعمل دیتا ہے جب اسے ثبوت دکھا کر سختی سے سوال کیا جاتا ہے۔

پولیس کے مطابق، چیتنیانند کے مبینہ فراڈ کی تحقیقات بھی جاری ہیں۔

اس سے پہلے دہلی پولیس نے قومی دارالحکومت کے وسانت کنج نارتھ پولیس اسٹیشن میں درج ایک شکایت کی بنیاد پر چیتنیانند سرسوتی کے خلاف مبینہ جنسی ہراسانی کا مقدمہ درج کیا تھا۔

ایف آئی آر کے مطابق، چیتانانند سرسوتی پر متعدد بار جنسی ہراسانی اور بدسلوکی کرنے کا الزام ہے۔ شکایت میں کہا گیا کہ سری شاردا پیٹھم، شرنگیری نے 2008 میں انہیں دیے گئے پاور آف اٹارنی کو منسوخ کر دیا ہے۔

ایف آئی آر کے ایک حصے میں کہا گیا کہ پیٹھم کو 28 جولائی اور1 اگست 2025 کو ایک طالبہ اور فضائیہ کے ایک افسر کی جانب سے خطوط موصول ہوئے جن میں ملزم کے "جنسی مظالم" کے الزامات لگائے گئے تھے۔ ان اطلاعات پر کارروائی کرتے ہوئے پیٹھم کی گورننگ کونسل نے 3 اگست کو 30 سے زائد طالبات کے ساتھ ورچوئل میٹنگ کی۔

اس میٹنگ میں طالبات نے الزام لگایا کہ ان کے ساتھ جنسی ہراسانی اور ذہنی اذیت دی گئی، اور یہ بھی دعویٰ کیا کہ کمزور معاشی پس منظر رکھنے والی طالبات پر مبینہ طور پر دباؤ ڈالا جاتا تھا کہ وہ رات کے وقت چیتنیانند سرسوتی کے کمرے میں جائیں۔

ایف آئی آر میں یہ الزامات بھی درج ہیں کہ واٹس ایپ اور ایس ایم ایس کے ذریعے فحش پیغامات بھیجے گئے اور ڈگریاں یا دستاویزات روکنے کی دھمکیاں دی گئیں۔

مزید یہ بھی الزام لگایا گیا کہ خواتین کے ہاسٹل میں سیکورٹی کے بہانے سی سی ٹی وی کیمرے نصب کیے گئے تھے اور چیتنیانند سرسوتی کے قریب سمجھے جانے والے کچھ لوگ طالبات کو ملزم کے مطالبات ماننے پر مجبور کرتے تھے جبکہ شکایات کو نظر انداز کیا جاتا تھا۔